2 րոպեի ընթերցում
Հայաստանի Հանրապետության բարձր տեխնոլոգիական արդյունաբերության նախարար Մխիթար Հայրապետյանն այցելել է Astronaut ինժեներական լաբորատորիա։ Կենտրոնը մասնագիտացած է կրտսեր ինժեներների պատրաստման, ինչպես նաև երիտասարդների շրջանում ինժեներական ոլորտի նկատմամբ հետաքրքրության խթանման գործում։
«Լաբորատորիայի հիմնադիր Արմեն Դարբինյանի ուղեկցությամբ շրջայց եմ կատարել կենտրոնում, ծանոթացել ընթացիկ գործունեությանը, կրթական ծրագրերին և զարգացման հեռանկարներին։ Լաբորատորիայի կրթական ծրագրերը ներառում են էլեկտրոնիկայի, անօդաչու թռչող սարքերի (ԱԹՍ) նախագծման և կառավարման, միկրոկոնտրոլերների ծրագրավորման, ինչպես նաև հարակից այլ ուղղություններ։
Կենտրոնի շրջանավարտները հաջողությամբ մուտք են գործում աշխատաշուկա՝ մասնագիտական գործունեություն ծավալելով էլեկտրոնիկայի նախագծման, արտադրության և վերանորոգման ոլորտներում։
Կենտրոնը համագործակցում է ինժեներական ոլորտի տարբեր ընկերությունների հետ՝ նպաստելով ուսանողների գործնական հմտությունների զարգացմանը։ Արմեն Դարբինյանի խոսքով՝ ծրագրերի բազմաթիվ շրջանավարտներ հետագայում շարունակում են իրենց կրթությունն ու մասնագիտական գործունեությունը տեխնոլոգիական ոլորտի առաջատար կազմակերպություններում»,– «Արմենպրես»-ի փոխանցմամբ՝ «Ֆեյսբուք»-ի իր էջում գրել է ՀՀ ԲՏԱ նախարարը։
Հանդիպման ընթացքում անդրադարձ է կատարվել նաև էլեկտրոնիկայի ոլորտում կանանց ներգրավվածության խթանման թեմային։ Նախարարը կարևորել է այս ուղղությամբ ներդրվող ջանքերը, մասնավորապես, այսօրինակ ծրագրերի խրախուսումն ու հանրության շրջանում իրազեկվածության բարձրացմանն ուղղված հետևողական աշխատանքների իրականացումը։
Նախարարը հիշեցրել է, որ 2022 թվականին Astronaut լաբորատորիան արժանացել է «Մեր ժամանակների հերոսը» գլխավոր մրցանակին։