2 րոպեի ընթերցում
ՀՀ վարչապետ Նիկոլ Փաշինյանը հայտարարել է, որ Հայաստանը Ռուսաստանի հետ քննարկում է նոր ատոմային էլեկտրակայանի կառուցման հարցը՝ ընդգծելով, որ Երևանը միաժամանակ բանակցում է նաև այլ գործընկերների հետ առավել շահավետ տարբերակ գտնելու համար։ «Արմենպրես»-ի հաղորդմամբ՝ Ռուսաստանի նախագահ Վլադիմիր Պուտինի հետ հանդիպման ընթացքում Փաշինյանը նշել է, որ էներգետիկայի ոլորտում հայ-ռուսական համագործակցությունը շարունակում է մնալ կարևոր և ավանդական ուղղություններից մեկը։
«Մենք համագործակցում ենք էներգետիկայի ոլորտում, և այստեղ ունենք շատ ավանդական, ամուր կապեր և համագործակցություն»,- ասել է վարչապետը։
Նրա խոսքով՝ ներկայում ակտիվ աշխատանք է տարվում նաև նոր տեխնոլոգիաների ուղղությամբ, մասնավորապես՝ վերականգնվող էներգետիկայի ոլորտում։
Փաշինյանը հատուկ անդրադարձել է նոր ատոմակայանի կառուցման թեմային։
«Դուք գիտեք, որ մենք Ռուսաստանի Դաշնության հետ քննարկում ենք նաև նոր ատոմային էներգակայանի կառուցման հարցը»,- նշել է նա։
Միևնույն ժամանակ վարչապետը ընդգծել է, որ այս հարցում Հայաստանը գործում է բաց և բազմակողմանի ձևաչափով։
«Մենք բացարձակ թափանցիկ ենք, որովհետև չենք թաքցնում, որ այդ հարցերը քննարկում ենք ոչ միայն ռուս գործընկերների, այլև այլ գործընկերների հետ, որովհետև փնտրում ենք Հայաստանի Հանրապետության համար ամենաշահավետ առաջարկը»,- ասել է Փաշինյանը։