2 րոպեի ընթերցում
Մերձավոր Արևելքում հակամարտության ընթացքում միջուկային ենթակառուցվածքներին հարվածները կունենան անկանխատեսելի և լայնածավալ հետևանքներ: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտարարել է Չինաստանի արտաքին գործերի նախարար Վան Ին Ատոմային էներգիայի միջազգային գործակալության (ԱՄԷԳ) գլխավոր տնօրեն Ռաֆայել Գրոսիի հետ հանդիպման ժամանակ:
«Մերձավոր Արևելքում ռազմական գործողություններն ընդլայնվում են, և եթե միջուկային օբյեկտները դառնան թիրախ հարվածների համար, ապա դա կհանգեցնի անչափ լուրջ հետևանքների և տարածաշրջանի ժողովուրդներին կնետի աղետների խորխորատը», - ասել է Վան Ին:
Նախարարի խոսքով՝ այժմ չափազանց կարևոր է կանխել դիմակայության հետագա սրումը, որը սպառնում է համաշխարհային խաղաղությանը և տարածաշրջանային կայունությանը: Նա հավելել է, որ անհապաղ հրադադարը և բանակցային գործընթացի վերսկսումն ընթացիկ ճգնաժամի սկզբնապատճառների վերացման միակ միջոցն են:
Իր հերթին, ԱՄԷԳ գլխավոր տնօրենն անհանգստություն է հայտնել աշխարհում իրադրության աննախադեպ անկայունության վերաբերյալ և վերահաստատել է գործակալության պատրաստակամությունը՝ հակամարտությունների կարգավորման գործում խորացնելու համագործակցությունը Չինաստանի հետ: Գրոսին նաև հայտարարել է, որ կազմակերպությունը բարձր է գնահատում Պեկինի գլոբալ նախաձեռնությունները և հաստատակամորեն կողմնակից է «մեկ Չինաստան» քաղաքականությանը: