Պարսից ծոցում լարվածության թուլացման բանակցությունների հարթակ կարող են լինել Պակիստանը կամ Թուրքիան․ Ռոյթերզ
2 րոպեի ընթերցում
Պարսից ծոցում լարվածության թուլացման վերաբերյալ քննարկումների վայրը կարող են լինել Պակիստանը կամ Թուրքիան։
«Արմենպրես»-ի հաղորդմամբ՝ այս մասին հաղորդում է «Ռոյթերզ»-ը, հղում անելով անանուն իրանցի բարձրաստիճան պաշտոնյային։
Աղբյուրը չի բացահայտել պատերազմի դադարեցման վերաբերյալ Պակիստանի կողմից ներկայացված առաջարկի մանրամասները, կամ արդյոք այն նույնն է, ինչ ԱՄՆ-ի 15 կետանոց ծրագիրը, որի մասին ավելի վաղ հաղորդել էին լրատվամիջոցները։
Լրատվամիջոցի զրուցակցի խոսքով՝ Թուրքիան նույնպես օգնել է պատերազմն ավարտելու գործընթացին, ուստի կամ Թուրքիան, կամ Պակիստանը կարող են լինել համապատասխան բանակցությունների վայր։
Ավելի վաղ՝ լրատվամիջոցները հղում անելով պակիստանցի պաշտոնյաներին, հայտնել էին, որ Իրանը ստացել է Մերձավոր Արևելքում պատերազմի դադարեցման վերաբերյալ ամերիկյան ծրագիրը։
Թեհրանը չի հաստատել, որ ստացել է ծրագիրը, և հրապարակայնորեն հերքել է ամերիկյան կողմի հետ շփումները։
Պակիստանցի երկու պաշտոնյա, որոնք 15 կետից բաղկացած ծրագիրը փոխանցել են Իրանին, հայտնել են, որ այն անդրադառնում է պատժամիջոցների մեղմացմանը, Իրանի միջուկային ծրագրի դադարեցմանը, հրթիռների թվաքանակի սահմանափակմանը և Հորմուզի նեղուցի բացմանը։
Եգիպտացի մի պաշտոնյա, որը ներգրավված է միջնորդական ջանքերում, հավելել է, որ առաջարկը ներառում է նաև Իրանի կողմից զինված խմբավորումներին աջակցության սահմանափակումներ։
Պակիստանցի և եգիպտացի պաշտոնյաները նաև հայտնել են, որ միջնորդները ցանկանում են, որ իրանցիները և ամերիկացիները բանակցություններ անցկացնեն մոտ օրերս՝ արդեն մարտի 27-ին։
Միևնույն ժամանակ տարածաշրջան են ուղարկվում լրացուցիչ ամերիկյան զորքեր։