ԱՄՆ-ն Մերձավոր Արևելք է տեղափոխել F-16 կործանիչների ևս մեկ էսկադրիլիա

ԱՄՆ ռազմաօդային ուժերը Իսրայելի Օվդա ավիաբազայում տեղակայել են տասներկու F-16 կործանիչներից բաղկացած լրացուցիչ էսկադրիլիա: «Արմենպրես»-ի փոխանցմամբ՝ այս մասին հաղորդում է «Ինտերֆաքս» գործակալությունը՝ վկայակոչելով Military Air Tracking Alliance (MATA) ավիացիոն ռեսուրսի տվյալները։

Իսրայելի Օվդա ավիաբազայում արդեն գտնվում է հինգերորդ սերնդի ամերիկյան F-22 Raptor տասներկու կործանիչից բաղկացած էսկադրիլիա։

Մերձավոր Արևելքում ամերիկյան մարտավարական ավիացիայի խմբավորումը ներկայում ունի շուրջ 250 ինքնաթիռ։ Դրանց ամենախոշոր կենտրոնացումը Հորդանանի «Մուվաֆաք Սալթի» ավիաբազան է, որտեղ տեղակայված են ամերիկյան մարտական ​​ինքնաթիռների, այդ թվում՝ F-35A-ի, F-15E-ի, F-16-ի և A-10-ի բազմաթիվ էսկադրիլիաներ։

Իսրայելից բացի, կործանիչները տեղակայված են նաև Սաուդյան Արաբիայի «Արքայազն Սուլթան» ավիաբազայում և ԱՄՆ ռազմածովային ուժերի «Աբրահամ Լինքոլն» ավիակրի վրա։

Ինչպես հաղորդել է Մերձավոր Արևելքում ԱՄՆ զինված ուժերի կենտրոնական հրամանատարությունը (CENTCOM), Իրանի դեմ գործողության սկզբից ի վեր ամերիկյան ռազմական ինքնաթիռները կատարել են ավելի քան 8000 մարտական ​​թռիչք։