Շրջանառվող փաստաթուղթը նոր Սահմանադրության հրապարակվելիք նախագիծը չէ․ Արդարադատության նախարարություն
1 րոպեի ընթերցում
Լրատվամիջոցներում շրջանառվող նոր Սահմանադրության նախագծի հետ կապված տեքստը չի հանդիսանում այն փաստաթուղթը, որը նախատեսվում է հրապարակել: «Արմենպրես»-ի փոխանցմամբ՝ այս մասին հայտարարել են Հայաստանի արդարադատության նախարարությունից՝ անդրադառնալով «Իշխանություն» լրատվականի հրապարակմանը,
«Սահմանադրական բարեփոխումների խորհուրդը շարունակում է իր գործունեությունը, և վերջնական տարբերակի ձևավորման գործընթացում կատարվում են ինչպես բովանդակային, այնպես էլ խմբագրական փոփոխություններ: Ըստ այդմ, առկա են բազմաթիվ աշխատանքային, ընդհուպ՝ սևագիր տարբերակներ, գործող Սահմանադրության տեքստի վերլուծական վարժություններ»,– հայտարարել են նախարարությունից՝ կոչ անելով առաջնորդվել բացառապես պաշտոնական տեղեկատվությամբ և սպասել նոր Սահմանադրության նախագծի պաշտոնական հրապարակմանը։
Ավելի վաղ «Իշխանություն» լրատվականը հրապարակել էր փաստաթուղթ և գրել, որ դա նոր Սահմանադրության տեքստի նախագիծն է, որն առաջիկայում նախատեսվում է հրապարակել։