Ապօրինի ծագում ունեցող գույքի բռնագանձման գործով հաշտության 10-րդ համաձայնությունն է կնքվել․ Գլխավոր դատախազ
2 րոպեի ընթերցում
Ապօրինի ծագում ունեցող գույքի բռնագանձման գործով հաշտության հերթական համաձայնությունն է կնքվել, որով ՀՀ-ի սեփականությանը կհանձնվի Քանաքեռավան գյուղում գտնվող շուրջ 20.6 հա մակերեսով, 323 միլիոն 800 հազար դրամ միջին շուկայական արժեքով գույքը։ «Արմենպրես»-ի հաղորդմամբ՝ մարտի 19-ի Կառավարության նիստում այս մասին հայտարարեց Գլխավոր դատախազ Աննա Վարդապետյանը
«Ապօրինի ծագում ունեցող գույքի բռնագանձման գործով Կոտայքի մարզի Նոր Հաճն համայնքի Քանաքեռավան գյուղում գտնվող շուրջ 20.6 հա մակերեսով, 323 միլիոն 800 հազար դրամ միջին շուկայական արժեքով գույքը Հայաստանի Հանրապետության սեփականությանը հանձնելու նպատակով կնքվել է հաշտության համաձայնություն, որը 2026 թվականի մարտի 5-ին հաստատվել է դատարանի վճռով»,– նշեց դատախազը՝ հիշեցնելով, որ Գլխավոր դատախազությունը 2023 թվականի օգոստոսի 29-ին ապօրինի ծագում ունեցող գույքի բռնագանձման հայցադիմում էր ներկայացրել Հակակոռուպցիոն դատարան՝ ընդդեմ Կոտայքի մարզի Աբովյան համայնքի նախկին ղեկավար Կարապետ Գուլոյանի օգնական Մանուկ Հակոբյանի և նրա կնոջ:
Աբովյան համայնքի նախկին ղեկավար Կարապետ Գուլոյանի վերաբերյալ Հակակոռուպցիոն կոմիտեում քննվող քրեական վարույթը՝ դատախազի կողմից հաստատված մեղադրական եզրակացությամբ, դատարան է հանձնվել 2025 նոյեմբերի 6-ին:
Վճիռն օրինական ուժ կստանա 2026 թվականի ապրիլին. գույքը կփոխանցվի Հայաստանի Հանրապետությանը:
Հայցապահանջում ներառված մյուս գույքերի բռնագանձման պահանջի մասով քաղաքացիական գործի քննությունը շարունակվում է:
Դատախազն ընդգծեց, որ ապօրինի ծագում ունեցող գույքի բռնագանձման լիազորության շրջանակում այս պահի դրությամբ կնքվել է հաշտության 10 համաձայնություն, որոնցից 1-ը դեռևս օրինական ուժ չի ստացել: