Կուբան սկսել է ազատ արձակել քաղբանտարկյալներին և բանակցություններ վարել Միացյալ Նահանգների հետ
1 րոպեի ընթերցում
Կուբան, որի նկատմամբ ԱՄՆ-ի նախագահ Դոնալդ Թրամփը նավթային էմբարգո է սահմանել, սկսել է քաղբանտարկյալների ազատ արձակումը և հաստատել է, որ բանակցություններ է վարում Միացյալ Նահանգների հետ։ Այդ մասին տեղեկացնում է «Արմենպրես»-ը՝ վկայակոչելով BBC-ին։
Կուբայի կոմունիստական իշխանությունները հայտարարել են, որ Վատիկանի հետ բանակցություններից հետո ազատ կարձակեն 51 բանտարկյալի։ Հավանան սա անվանել է բարի կամքի դրսևորում։ Վատիկանը նախկինում միջնորդ կողմ է եղել Կուբայի և Միացյալ Նահանգների միջև բանակցություններում։
Բանտարկյալների ազատ արձակման մասին հայտարարությունից մի քանի ժամ առաջ Կուբայի նախագահ Միգել Դիաս-Կանելը հաստատել է, որ Հավանան բանակցություններ է վարում Վաշինգտոնի հետ, սակայն քիչ բան է հայտնել դրանց բովանդակության մասին։
«Բանակցությունների նպատակն է գտնել երկխոսության միջոցով փոխադարձ տարաձայնությունները հաղթահարելու ուղիներ», - ասել է Դիաս-Կանելը։
Այդ բանակցությունները վարում են Ռաուլ Գիլյերմո Ռոդրիգես-Կաստրոն՝ Կուբայի նախկին նախագահ Ռաուլ Կաստրոյի թոռը, և ԱՄՆ-ի պետքարտուղար Մարկո Ռուբիոն, որի ծնողները Միացյալ Նահանգներ են ներգաղթել Կուբայից։