2 րոպեի ընթերցում
Իրանում ամերիկյան ուժերի կողմից անցկացվող «Էպիկական ցասում» գործողությանը մասնակցում է 50 000 զինծառայող. վերջին 72 ժամում ամերիկյան ուժերն Իրանի տարածքում խոցել են 200 թիրախ։ «Արմենպրես»-ի փոխանցմամբ՝ այս մասին հայտարարել է ԱՄՆ զինված ուժերի կենտրոնական հրամանատարության ղեկավար ծովակալ Բրեդ Քուփերը մամուլի ասուլիսում, որը հրապարակվել է X հարթակում CENTCOM-ի էջում։
Նա հավելել է, որ ամերիկյան B-2 ռմբակոծիչները տասնյակ ռումբերով թիրախավորել են Իրանում բալիստիկ հրթիռների արձակման կայանքներ, որոնք գտնվում են գետնի տակ մեծ խորության վրա։ Քուփերի խոսքով՝ վերջին 24 ժամում Իրանի կողմից բալիստիկ հրթիռներով հարձակումները նվազել են 90%-ով, անօդաչու թռչող սարքերով հարձակումները՝ 83%-ով։
Քուփերը հավելել է, որ մի քանի ժամվա ընթացքում ԱՄՆ-ն խոցել է իրանական 30 նավ, ինչպես նաև անօդաչուներ կրող նավ։
«Նախագահը մեզ ևս մեկ առաջադրանք է տվել՝ ոչնչացնել կամ գետնին հավասարեցնել Իրանի բալիստիկ հրթիռների արդյունաբերական հիմքը։ Մենք պարզապես չենք հարվածում այն անենին, ինչ նրանք ունեն, մենք ոչնչացնում ենք վերակառուցելու նրանց հնարավորությունները», - ասել է հրամանատարը՝ հավելելով, որ դա որոշ ժամանակ կպահանջի։
Քուփերի հետ համատեղ մամուլի ասուլիսում Պենտագոնի ղեկավար Փիթ Հեգսեթը հայտարարել է, որ ԱՄՆ-ն զինամթերքի պակաս չունի և կարող է ռազմական գործողությունները շարունակել «այնքան, որքան դրա կարիքը լինի»։