Գավառի համայնքապետարանը կապիտալ դրամաշնորհներ է հատկացրել Գեղարվեստի դպրոցին

Գեղարքունիքի մարզի Գավառի համայնքապետարանը կապիտալ դրամաշնորհներ է հատկացրել  Գավառ քաղաքի Գեղարվեստի դպրոցին։

Ինչպես «Արմենպրես»-ին տեղեկացրին Գավառի համայնքապետարանի աշխատակազմից,    համայնքապետարանի 2024 և 2025 թվականների բյուջեից կապիտալ և ընթացիկ դրամաշնորհների տեսքով, 3 միլիոն 895 հազար դրամի չափով,  Գավառի գեղարվեստի դպրոցին միջոցներ են տրամադրվել՝  անհրաժեշտ գույք, տեխնիկա և աշխատանքային միջոցներ  ձեռք բերելու համար։

Գեղարվեստի դպրոցին 2024 թվականին 1 միլիոն 545 հազար դրամ կապիտալ դրամաշնորհ է հատկացվել։ Ձեռք է բերվել դյուրակիր համակարգիչ, պրոյեկտոր, պրոյեկտորի էկրան, բարձրախոս, խոսափող, տեսահսկող համակարգ, կարի մեքենա, արդուկ, սառնարան, մասնագիտական գրքեր և պարկաթոռ։ Իսկ 900 հազար դրամ ընթացիկ դրամաշնորհով դպրոցը գնել է փափուկ և պլաստմասե աթոռներ, ինչպես նաև աշխատանքային նպատակներին ծառայող խառնիչ։ 2025 թվականի բյուջեից նաև 300 հազար դրամ է հատկացվել՝ հատուկ նպատակային նյութերի ձեռք բերման համար։

2025 թվականին կապիտալ դրամաշնորհով, որը կազմել է 700 հազար դրամ,  դպրոցը ձեռք է բերել տպագրական մամլիչ և ցուցափեղկեր։ 600 հազար դրամ արժողությամբ ընթացիկ դրամաշնորհով էլ գնվել են փորագրման գործիքներ, տպագրական ներկ, նկարի շրջանակներ և ցուցադրության համար նախատեսված հատուկ լույսեր։ 2025 թվականին ևս համայնքի  բյուջեից 450 հազար դրամ է տրամադրվել դպրոցին՝ հատուկ նպատակային նյութերի ձեռքբերման համար։

Համայնքապետարանում համոզված են, որ համայնքային ենթակայությամբ գործող կրթական հաստատություններին այսօրինակ աջակցությունները օգնում են՝ աշխատանքները պահանջված չափորոշիչներին համապատասխան կազմակերպելու համար։