Իրանի կողմից Թուրքիայի վրա հրթիռային հարձակումը հիմք չի տալիս ՆԱՏՕ-ի 5-րդ հոդվածը կիրառելու համար. Ռյուտե

Իրանի կողմից Թուրքիայի վրա հրթիռային հարվածը լուրջ միջադեպ էր, այնուամենայնիվ, ստեղծված իրավիճակը հիմք չի ստեղծում ՆԱՏՕ-ի 5-րդ հոդվածի փոխադարձ պաշտպանության կետը գործարկելու համար։ «Արմենպրես»-ի հաղորդմամբ՝ այս մասին Reuters-ի հետ հարցազրույցում հայտարարել է ՆԱՏՕ-ի գլխավոր քարտուղար Մարկ Ռյուտեն։

«Կարծում եմ՝ 5-րդ հոդվածն այստեղ պարտադիր չէ, և ոչ ոք չի խոսում 5-րդ հոդվածի մասին։ Եվ ամենակարևորն այն է, որ մեր հակառակորդները երեկ տեսան, որ ՆԱՏՕ-ն այնքան ուժեղ է և այնքան զգոն, նույնիսկ ավելի զգոն շաբաթ օրվանից (փետրվարի 28-ից) ի վեր՝ Մերձավոր Արևելքում իրավիճակի պատճառով» -, նշել է նա։

ՆԱՏՕ-ի կանոնադրության 5-րդ հոդվածը սահմանում է, որ դաշինքի անդամներից մեկի վրա հարձակումը համարվում է հարձակում մյուս բոլորի վրա։

Ավելի վաղ Իրանի զինված ուժերից հայտնել են, որ հարգում են հարևան Թուրքիայի ինքնիշխանությունը, և հերքել են երկրի տարածքի ուղղությամբ հրթիռի արձակումը։ 

Ռյուտեն նաև հայտնել է, որ ՆԱՏՕ-ի դաշնակիցները չեն մասնակցում Իրանի դեմ ԱՄՆ-ի և Իսրայելի պատերազմին, բայց ապահովում են դրան նպաստող կարևոր աջակցություն։ Նրա խոսքով՝ հարկավոր է վստահ լինել, որ ՆԱՏՕ-ի տարածքի յուրաքանչյուր հատված պաշտպանված է, ինչը և արվում է։

Ռյուտեն ընդգծել է, որ Իրանը պետք է զերծ մնա Մերձավոր Արևելքի, հարևան երկրների, Իսրայելի և Եվրոպայի դեմ սպառնալից հռետորաբանությունից և խուսափի այնպիսի քայլերից, որոնք կարող են մեծացնել լարվածությունը։

Նա հավելել է, որ համատեղ պատասխանատվությունը կարևոր է տարածաշրջանային և համաշխարհային անվտանգության ապահովման համար։

Ավելի վաղ Ռյուտեն հայտարարել էր, որ Իրանը մոտ էր միջուկային, հրթիռային կարողություններ ձեռք բերելուն, ինչը կարող էր սպառնալիք լինել տարբեր երկրների համար