ՀՀ Գեղարքունիքի մարզում մեկնարկել են ՀՀ Դպրոցականների բասկետբոլի լիգայի համայնքային փուլի մրցումները

ՀՀ Գեղարքունիքի  մարզում  մեկնարկել   են ՀՀ Դպրոցականների բասկետբոլի լիգայի համայնքային փուլի մրցումները։

Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի ԿՄՍ վարչությունից, Բասկետբոլի  լիգան անցկացվում է 3 փուլով՝ համայնքային, մարզային և եզրափակիչ։ Այն  անցկացվելու է 2 տարիքային խմբով ։ 1-ին տարիքային խմբում ընդգրկված են 5-6-րդ , իսկ 2-րդ տարիքային խմբում՝ 7-9-րդ դասարանների աշակերտները։ Թիմի կազմում պետք է ընդգրկված լինեն  թե՛ տղաներ և թե՛ աղջիկներ: Խաղի ընթացքում դաշտում միաժամանակ պետք է գտնվեն 3 տղա և 2 աղջիկ կամ 2 տղա և 3 աղջիկ։ Յուրաքանչյուր խաղին թիմի կազմում կարող են հայտագրվել 9 աշակերտ։

ՀՀ  Գեղարքունիքի մարզում մարզական խաղերի համայնքային փուլին հայտագրվել էին 54 հանրակրթական դպրոցների 77 թիմեր։ Առաջինը մրցապայքարի մեջ մտան Մարտունու համայնքային փուլին հայտագրված թիմերը։ Փետրվարի 26-ին Ծովինարի  Արծրուն Խաչատրյանի անվան միջնակարգ դպրոցի մարզադահլիճում պայքարի մեջ են  մտել  1-ին տարիքային խմբում հայտագրված թիմերը։ Հետաքրքիր մրցապայքարի արդյունքում հաղթող է ճանաչվել Վերին Գետաշենի Հ․ 1 միջնակարգ դպրոցի թիմը։ Երկրորդ և երրորդ տեղերը գրավել են   Ծակքարի միջնակարգ  և Մարտունու  Ս. Դարբինյանի անվան Հ․ 2  հիմնական  դպրոցների թիմերը։ Փետրվարի 27-ին հանդիպել են  2-րդ տարիքային խմբի թիմերը։ Այստեղ ուժեղագույնը Մարտունու  Ս. Դարբինյանի անվան Հ․ 2  հիմնական  դպրոցի թիմն էր։ Երկրորդ հորիզոնականում Ծակքարի միջնակարգ դպրոցի թիմն էր, իսկ երրորդ հորիզոնականը բաժին է հասել  Վերին Գետաշենի Հ․ 1 միջնակարգ դպրոցի թիմին։

 Փետրվարի 28-ին Ճամբարակի ավագ դպրոցի մարզադահլիճում անցկացվել են  Ճամբարակի համայնքային փուլի 1-ին տարիքային խմբի մրցումները։ Այս տարիքային խմբում հաղթող է ճանաչվել   Ճամբարակի Հ․ 1 հիմնական դպրոցի թիմը։ Երկրորդ տեղում Ճամբարակի Հ․ 4 միջնակարգ դպրոցի թիմն էր, երրորդում՝ Թթուջրի միջնակարգ դպրոցի թիմը։ 2-րդ տարիքային խմբի թիմերի մրցապայքարը տեղի է ունեցել  մարտի 1-ին։ Համառ մրցապայքարում հաղթող է ճանաչվել   Վահանի միջնակարգ դպրոցի թիմը։ Այստեղ 2-րդը Ճամբարակի Հ․ 1 հիմնական դպրոցի թիմն էր, իսկ երրորդ հորիզոնականը զբաղեցրել է  Գետիկի միջնակարգ դպրոցի թիմը։

Մրցանակային տեղեր գրաված թիմերին ԿԳՄՍ նախարարության կողմից հանձնվել են  հավաստագրեր։

Համայնքային փուլի յուրաքանչյուր տարիքային խմբում առաջին տեղ գրաված թիմերը համայնքը կներկայացնեն մարզային փուլի մրցումներում։

Խոսրով  Խլղաթյան