1 րոպեի ընթերցում
Իսրայելի պաշտպանության բանակը (ԻՊԲ) հաստատել է Բեյրութում «Հեզբոլլահ» շարժման հետախուզության շտաբի պետի ոչնչացումը։ «Արմենպրես»-ի փոխանցմամբ՝ այս մասին ԻՊԲ-ն հաղորդագրություն է տարածել իր Telegram ալիքում:
«ԻՊԲ-ն հիմա հաստատում է, որ գիշերը (կիրակի) Բեյրութում ճշգրիտ հարվածի հետևանքով ոչնչացվել է ահաբեկիչ Հուսեյն Մաքլեդը, որը զբաղեցնում էր «Հեզբոլլահ»-ի հետախուզության շտաբի պետի պաշտոնը», - ասվում է հաղորդագրության մեջ։
Լիբանանում գործող «Հեզբոլլահ»-ը մարտի 2-ին իսրայելական կողմի դեմ կրակ է բացել ՝ ի պատասխան Իրանի գերագույն առաջնորդ այաթոլլա Ալի Խամենեիի սպանության։
Ի պատասխան դրա՝ Իսրայելը հարձակումներ է իրականացրել Լիբանանի տարբեր հատվածներում, ինչի հետևանքով զոհվել է 31 մարդ, վիրավորվել՝ գրեթե 150-ը։
Այս հարվածների պատճառով Լիբանանում բոլոր կրթական հաստատությունները փակվել են։