2 րոպեի ընթերցում
Գեղարքունիքի մարզի Սևան համայնքում անցկացվել է «Գեղարքունյաց ձմեռ» մարզամշակութային միջոցառումը՝ «Լինենք առողջ» խորագրով:
«Արմենպրես»-ի թղթակցին Սևանի համայնքապետարանից տեղեկացրին, որ միջոցառումը կազմակերպել են Սևանի համայնքապետարանը, Ն. Դագարյանի անվան մանկապատանեկան մարզադպրոցը և համայնքային մշակութային կենտրոնը։
Միջոցառմանը մասնակցել են Սևան համայնքի հանրակրթական դպրոցների, Ն. Դագարյանի անվան մանկապատանեկան մարզադպրոցի աշակերտներն ու սաները, մարզասերներ, բնակիչներ:
Միջոցառումը մեկնարկել է Սևանի բազմագործառութային քոլեջի հարակից բազմաֆունկցիոնալ մարզահրապարակից, որտեղ էլ կայացել է նախատեսված մարզաձևերի և խաղերի զգալի մասը՝ 8-16 կգ կշռաքարի բարձրացում, ազգային կոխ ըմբշամարտի անցկացում, նետում նշանակետին, ձնեմարդի պատրաստում:
Սևանի ՈՄԱ մարզասրահում անցկացվել է հրաձգության մրցում, որին մասնակցել են Սևանի և հարակից բնակավայրերի հանրակրթական դպրոցների բարձր դասարանների աշակերտները:
Ն. Դագարյանի անվան մանկապատանեկան մարզադպրոցում անցկացվել են շախմատի և մինի ֆուտբոլի մրցաշարեր:
Նախատեսված էր նաև «բարձունքի գրավում», որն անցկացվել է Մեծեփ սարի վրա:
Սևան համայնքի ղեկավարի պատվոգրով, շնորհակալագրով և հավաստագրերով պարգևատրվել են լավագույն մասնակիցներն ու հաստատությունները, որոնք արժանացել են նաև հուշանվերների ու գավաթների: