Եվրոպական հանձնաժողովը պահանջում է, որ ԵՄ գործարանները 50 անգամ ավելացնեն զենքի արտադրությունը
2 րոպեի ընթերցում
Եվրոպական հանձնաժողովը Եվրամիության երկրների ռազմարդյունաբերական համալիրից պահանջում է, որ ԵՄ երկրները 50 անգամ ավելացնեն արտադրությունը։ Ինչպես «Արմենպրես»-ը տեղեկանում է ՏԱՍՍ գործակալությունից, այս մասին հայտարարել է պաշտպանության և տիեզերքի հարցերով եվրահանձնակատար Անդրյուս Կուբիլյուսը՝ ելույթ ունենալով Մադրիդում պաշտպանական համաժողովում։
Նա կարծիք է հայտնել, որ Ռուսաստաի կողմից Ուկրաինայում ռազմական գործողությունների մեկնարկից ի վեր Կիևը «50 անգամ ավելացրել է ռազմական արտադրությունը»։
«Եվրոպական հավակնությունները պետք է լինեն նույնը։ Պետք է կառուցվեն նոր գործարաններ, պետք է օգտագործվեն նորագույն սարքավորումներ, պետք է ներգրավվեն որակյալ աշխատողներ այդքան զենք արտադրելու համար», - նշել է նա։
Եվրահանձնակատարի խոսքով՝ դրա համար ԵՄ երկրները պետք է արդյունաբերությանը երաշխավորեն «զենքի երկարաժամկետ և կայուն պահանջարկ», որը, նրա պնդմամբ, անհրաժեշտ է Եվրոպայում խաղաղության համար։
Կուբիլյուսը ԵՄ անդամներին կոչ է արել օրենսդրական մակարդակում «ամրագրել խոշոր ռազմական պաշարների պահպանման անհրաժեշտությունը», որպեսզի ռազմարդյունաբերական համալիրի ձեռնարկությունները վստահություն ունենան ներդրումների հուսալիության հարցում: