Մենք պատվում ենք հայ ժողովրդի տոկունությունն ու անսասան ոգին. Վենսի գրառումը՝ Ցեղասպանության թանգարանի հուշամատյանում
1 րոպեի ընթերցում
Ամերիկայի Միացյալ Նահանգների փոխնախագահ Ջեյ Դի Վենսը գրառում է կատարել Հայոց ցեղասպանության թանգարանի պատվավոր հյուրերի հուշամատյանում։
«Արմենպրես»-ի փոխանցմամբ՝ Ջեյ Դի Վենսը փետրվարի 10-ին այցելել է Ծիծեռնակաբերդի հուշահամալիր, հարգանքի տուրք մատուցել Հայոց ցեղասպանության զոհերի հիշատակին, իսկ այցի ավարտին Ցեղասպանության թանգարանի հուշամատյանում կատարել է հետևյալ գրառումը.
«Կորցրած կյանքերի հանդեպ խորին հարգանքի հիշատակով մենք պատվում ենք հայ ժողովրդի տոկունությունն ու անսասան ոգին։ Թող Ամերիկան և Հայաստանը միասին ձգտեն ապագայի, որտեղ խաղաղություն է և փոխըմբռնում»:
Այցի ավարտին Հայոց ցեղասպանության թանգարան-ինստիտուտի տնօրեն Էդիտա Գզոյանը Ջեյ Դի Վենսին է փոխանցել Հայոց ցեղասպանության և Լեռնային Ղարաբաղի հիմնախնդրի մասին գրքեր: