2 րոպեի ընթերցում
Սանկտ Պետերբուրգի Օկտյաբրսկի շրջանային դատարանը կալանավորել է Լենինգրադի մարզի բնակիչ Պավել Ժիլկինին, որը մեղադրվում է 9-ամյա երեխայի սպանության մեջ։ Ինչպես տեղեկացնում է «Արմենպրես»-ը, վկայակոչելով Interfax-ը, այս մասին հայտնել է քաղաքի դատարանի մամուլի ծառայությունը։
Դատարանի որոշմամբ խափանման միջոց է ընտրվել կալանքը՝ մինչև մարտի 31-ը։ Նշվում է, որ մեղադրյալը ընդունել է իր մեղքը։
Քննության վարկածով՝ հունվարի 30-ին Ժիլկինը իր ավտոմեքենայում հարվածել է ավելի վաղ ծանոթ 9-ամյա տղայի գլխին՝ սեռական բնույթի գործողություններ կատարելուց հրաժարվելու պատճառով։ Երեխան ստացած վնասվածքներից մահացել է, ինչից հետո մեղադրյալը մարմինը թաքցրել է Լենինգրադի մարզի Լոմոնոսովի շրջանի Սիմոնովսկի գետում։
Պավել Ժիլկինը ձերբակալվել է փետրվարի 2-ին Պսկովի մարզում։ Նրա նկատմամբ մեղադրանք է առաջադրվել սպանության հոդվածով։ Գործի քննության ընթացքն ու արդյունքները վերահսկվում են Սանկտ Պետերբուրգի դատախազության կողմից։
Դատախազությունում հայտնել են, որ կգնահատվի նաև պաշտոնատար անձանց գործունեությունը, այդ թվում՝ սոցիալապես վտանգավոր վիճակում գտնվող ընտանիքների հետ տարվող աշխատանքի արդյունավետությունը։
Վերահսկող մարմինը նշել է, որ մանկահասակ երեխայի սպանությունը դասվում է առանձնապես ծանր հանցագործությունների շարքին, որի համար ՌԴ քրեական օրենսգիրքը նախատեսում է պատիժ՝ ընդհուպ մինչև ցմահ ազատազրկում։
Ավելի վաղ հաղորդվել էր, որ հունվարի 30-ին Սանկտ Պետերբուրգի Կրասնոսելսկի շրջանում 9-ամյա տղան նստել է Ժիլկինի ավտոմեքենան և անհետացել։ Իրավապահ մարմիններում հայտնել են նաև, որ մեղադրյալի բնակարանի խուզարկության ընթացքում հայտնաբերվել են տեխնիկական միջոցներ՝ անչափահասների մասնակցությամբ պոռնոգրաֆիկ նյութերով։ Հետաքննությունը ստուգում է նրա հնարավոր առնչությունը երեխաների նկատմամբ այլ հանցագործություններին։