2 րոպեի ընթերցում
ՀՀ տարածքային կառավարման և ենթակառուցվածքների նախարար Դավիթ Խուդաթյանի մամուլի ասուլիսը
«Հյուսիս-հարավ» ճանապարհի շինարարության շրջանակներում ամբողջությամբ ավարտվել են դեպի Գյումրի գնացող հատվածի շինարարական աշխատանքները։
«Արմենպրես»-ի հաղորդմամբ՝ այս մասին հայտարարեց ՀՀ տարածքային կառավարման և ենթակառուցվածքների նախարար Դավիթ Խուդաթյանը փետրվարի 3-ի ամփոփիչ ասուլիսի ժամանակ։
Այդ հատվածում առաջիկա օրերին կավարտվեն նաև լուսավորության ցանցի անցկացման աշխատանքները։ Ցանցը, որպես այդպիսին, արդեն անցկացված է, հիմա միացումները կլինեն, որից հետո ճանապարհն ամբողջությամբ կհանձնվի շահագործման»,-ասաց Խուդաթյանը։
Նրա տեղեկատվությամբ՝ հարավային հատվածում ինտենսիվ շինարարական աշխատանքներ են իրականացվել։ Մասնավորապես՝ Քաջարան-Ագարակ հատվածում ներկա պահին կատարողականը կազմում է ավելի քան 40 տոկոս։
«Այս պահին այդ շինարարությունը համարվում է Հայաստանում ամենամեծը, և 2025 թվականի ընթացքում մենք այնտեղ միջինը օրական շուրջ 65 միլիոն դրամի իրականացված աշխատանք ենք ունեցել, շուրջ 700 աշխատակից է այնտեղ աշխատել և ավելի քան 240 միավոր տեխնիկա»,-մանրամասնեց նախարարը։
Ըստ Խուդաթյանի՝ նշված հատվածում արդեն ավարտվել են 2 թունելներից մեկի փորման աշխատանքները, իսկ մյուսինը կատարվել է զգալի չափով։
Գերատեսչության ղեկավարը նշեց, որ դրանցից մեկը վերջին 30 տարում զրոյից փորված և ամենաերկար թունելն է համարվում Հայաստանում։
Այդ հատվածում նախատեսված է նաև 15 կամրջի շինարարություն, որոնցից 14-ի մասով ներկայում աշխատանքներ են իրականացվում։
Ամփոփվել է Քաջարանի թունելի կառուցման մրցույթը, իսկ առաջիկայում կկնքվի նաև համապատասխան պայմանագիրը։ Զուգահեռ աշխատանքներ են տարվում նաև թունելին մոտեցող հատվածում։ Խուդաթյանի խոսքով՝ Քաջարանի թունելի բուն շինարարական աշխատանքները կմեկնարկեն 2026 թվականին։