Նիգերիայում անհայտ անձինք պատարագի ժամանակ առևանգել են ավելի քան 160 քրիստոնյաների

Նիգերիայի հյուսիսում անհայտ զինյալները հունվարի 18-ին առևանգել են ավելի քան 160 քրիստոնյաների, որոնք կիրակնօրյա պատարագներին էին մասնակցում երկու եկեղեցիներում։ «Արմենպրես»-ի հաղորդմամբ՝ այս մասին հայտնում է Agence France-Presse-ը՝ վկայակոչելով Հյուսիսային Նիգերիայի Քրիստոնեական ասոցիացիայի նախագահ Ջոզեֆ Հայաբային։

«Մեծաթիվ հարձակվողները փակել են եկեղեցիների մուտքերը և հավատացյալներին ստիպել են հետևել իրենց»,- հայտնել է նա։

Sahara Reporters լրատվական պորտալը հաղորդում է, որ կիրակի օրը Կադունա նահանգի Կուրմին շրջանում մի քանի եկեղեցիներ են հարձակման ենթարկվել։ Պատարագների ժամանակ առևանգվել է ավելի քան 100 հավատացյալ։

Իշխանությունները տեղեկացվել են միջադեպի մասին և միջոցներ են ձեռնարկում առևանգվածներին հայտնաբերելու համար։

Վերջին երկու տարիներին Նիգերիայում հաճախակի են դարձել հավատացյալներին առևանգելու նպատակով հարձակումները եկեղեցիների վրա։ Հանցագործները սովորաբար մեծ փրկագին են պահանջում նրանց ազատ արձակելու համար։