2 րոպեի ընթերցում
«Տաշիր» ընկերությունների խմբի հիմնադիր Սամվել Կարպետյանի նկատմամբ կիրառվել է տնային կալանք։
«Արմենպրես»-ի փոխանցմամբ՝ այդ մասին հայտնել է փաստաբան Արամ Վարդևանյանը։
Վարդևանյանը նաև հայտնել է, որ Սամվել Կարապետյանի հրապարակային խոսքի սահմանափակումը վերացվել է։
Ավելի վաղ Սամվել Կարապետյանի նկատմամբ կիրառված խափանման միջոց կալանքը փոխվել էր գրավով և տնային կալանքով, Դատախազությունը, սակայն, բողոքարկել էր այդ որոշումը և Կարապետյանին կրկին կալանավորելու միջնորդություն էր ներկայացրել։
Մինչ դատարանի կողմից ՀՀ դատախազության բողոքարկման քննարկումը, Հակակոռուպցիոն դատարանը բեկանել էր Կարապետյանի նկատմամբ տնային կալանք կիրառելու որոշումը և նրան կալանավորելու որոշում ընդունել։
Սամվել Կարապետյանին մեղադրանք է առաջադրվել իշխանությունը զավթելու և սահմանադրական կարգը տապալելու հրապարակային կոչեր հնչեցնելու համար։
Հոկտեմբերի 13-ին Քննչական կոմիտեն հայտնել էր, որ Սամվել Կարապետյանի մեղադրանքը փոփոխվել է և ավելացվել են Քրեական օրենսգրքի 296-րդ հոդվածի 3-րդ մասի 2-րդ և 3-րդ կետերը (իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով առանձնապես խոշոր չափերով փողերի լվացումը)։
Կարապետյանը չի ընդունում իրեն առաջադրված մեղադրանքները։