2 րոպեի ընթերցում
Իրանը ՄԱԿ-ից պահանջում է դատապարտել խռովարարների հանցագործությունները, որոնք կատարվել են Իսլամական Հանրապետությունում իրավապահ մարմինների ներկայացուցիչների և խաղաղ քաղաքացիների դեմ։ Ինչպես «Արմենպրես»-ը տեղեկանում է ՏԱՍՍ գործակալությունից, այս մասին հայտարարել է Իրանի արտաքին գործերի նախարար Աբբաս Արաղչին ՄԱԿ-ի գլխավոր քարտուղար Անտոնիու Գուտերեշի հետ հեռախոսազրույցի ժամանակ:
«Հրեշավոր հանցագործությունները, որոնք կատարվել են իրավապահ մարմինների (աշխատակիցների) և սովորական քաղաքացիների դեմ, երեխաների և կանանց սպանությունները, մարդկանց հրկիզումները, հարձակումները հիվանդանոցների և բժշկական կենտրոնների վրա, մեծ քանակությամբ շտապ օգնության և հրշեջ մեքենաների հրկիզումները, մզկիթների և մշակութային կենտրոնների ավերումն «Իսլամական պետության» ահաբեկչության մոդելն են, և մենք պահանջում ենք, որ ՄԱԿ-ը դատապարտի այդ հանցագործությունները», - մեջբերել է նախարարի խոսքը պետական հեռուստառադիոընկերությունը:
Ընդ որում, Արաղչին ընդգծել է, որ ԱՄՆ իշխանություններն Իսրայելի հետ միասին մեղսակից են «Իրանի դեմ ռազմական ագրեսիային» և պատասխանատվություն են կրում «վերջին անկարգությունների ժամանակ զինված ահաբեկիչների կողմից հարյուրավոր իրանցիների սպանության» համար: Նրա խոսքով՝ նրանք «չեն կարող թաքցնել իրենց հանցագործությունները՝ նիստ անցկացնելով Անվտանգության խորհրդում»:
ՄԱԿ-ի Անվտանգության խորհրդում ԱՄՆ-ի հրավերով հունվարի 15-ին արտակարգ նիստ է անցկացվել Իրանում տիրող իրավիճակի վերաբերյալ։
Դեկտեմբերի 28-ից Իրանում լայնածավալ ցույցեր են տեղի ունեցել իրանական ռիալի կտրուկ արժեզրկման և մեծ գնաճի ֆոնին։ Հակակառավարական ցույցերն ուղեկցվել են բախումներով և անկարգություններով։ Արևմտյան լրատվամիջոցները, վկայակոչելով իրավապաշտպան խմբերին, հայտնել են ավելի քան 2500 զոհի մասին, սակայն Իրանի ԱԳ նախարարը FoxNews-ի հետ հարցազրույցում նշել է, որ զոհերի թիվը մի քանի հարյուր է։