Նպատակ ունենք Հայաստանում այլևս չունենալ ջրծաղիկի բռնկումներ․ Ավանեսյան

Կառավարության նիստի ընթացքում առողջապահության նախարար Անահիտ Ավանեսյանը ներկայացրեց 2026–2030 թվականների իմունականխարգելման ազգային ծրագիրը և կանխարգելիչ պատվաստումների վկայականի ստացման կարգը հաստատելու մասին նախագիծը։

«Արմենպրես»-ի հաղորդմամբ՝ Կառավարության որոշմամբ հաստատվում է հանրային առողջապահության կարևորագույն երաշխիքներից մեկը՝ պատվաստումների ազգային օրացույցը, ինչպես նաև պատվաստումների վերաբերյալ միջազգային վկայականների տրամադրման ձևաչափը։ Միաժամանակ սահմանվում են այն թիրախները, որոնք ուղղված են զրոյից մեկ տարեկան երեխաների պատվաստումների բարձր ցուցանիշների պահպանմանը և վտանգավոր վարակիչ հիվանդությունների զրոյական դեպքերի ապահովմանը։

«Վերջին տարիներին ազգային օրացույցում ներդրվել են նոր և ժամանակակից պատվաստանյութեր, այդ թվում՝ վերջին սերնդի համակցված վեցավալենտ պատվաստանյութերը, որոնք նվազեցնում են բազմակի պատվաստումների անհրաժեշտությունը»,-ասաց նախարարը։

Նա առանձնակի նշել է նաև ջրծաղիկի պատվաստանյութը, որն արդեն ներառված է ազգային օրացույցում։

«Պետք է նշեմ, որ ջրծաղիկի պատվաստումների առումով մեր նպատակն է ապահովել, որպեսզի երեխաները զորակոչի տարիքում արդեն ունենան կայուն իմունիտետ, և ջրծաղիկը՝ որպես հիվանդացություն առաջացնող ու աշխատանքային գործընթացներին լուրջ խոչընդոտ հանդիսացող հիվանդություն, Հայաստանում այլևս չունենա ո՛չ բռնկումներ, ո՛չ էլ առանձին դեպքեր»,- ասաց նախարարը

Նախարարի խոսքով՝ պատվաստումների և հանրության իրազեկման ուղղությամբ տարվող աշխատանքներն արդեն տալիս են արդյունքներ։ «Մասնավորապես, 2025 թվականին զրոյից մեկ տարեկան երեխաների պատվաստումների ցուցանիշը կազմել է 95.1 տոկոս, ինչը 2011 թվականից ի վեր ամենաբարձր ցուցանիշն է»,- նշեց նախարարը։

Նրա խոսքով՝ Հայաստանը նաև ապահովում է այլ երկրներ ճանապարհորդելու համար անհրաժեշտ պատվաստանյութերի պաշարների առկայությունը և տրամադրում է միջազգային ձևաչափի համապատասխան սերտիֆիկատներ։