2 րոպեի ընթերցում
ԱՄՆ նախագահ Դոնալդ Թրամփը Գրենլանդիայի բնակիչների՝ Միացյալ Նահանգներին միանալ չցանկանալը համարում է «իրենց խնդիրը»։
«Արմենպրես»-ի փոխանցմամբ՝ Վաշինգտոնի մոտակայքում գտնվող «Էնդրյուս» ռազմաօդային բազայում լրագրողների հետ զրույցում ԱՄՆ նախագահը նաև սպառնացել է Գրենլանդիայի վարչապետ Յենս-Ֆրեդերիկ Նիլսենին։
«Դա նրանց խնդիրն է։ Ես համաձայն չեմ նրանց հետ։ Ես չգիտեմ, թե ով է նա (խմբ.` Գրենլանդիայի վարչապետը), ես ոչինչ չգիտեմ նրա մասին, բայց դա մեծ խնդիր է լինելու նրա համար», - ասել է Թրամփը լրագրողների հետ զրույցում, որի տեսանյութը տարածել է SkyNews Australia-ն։
Գրենլանդիան ձեռք բերելու Թրամփի նկրտումների շուրջ առճակատումը նոր գագաթնակետին է հասել հունվարի 13-ին Կոպենհագենում կայացած համատեղ մամուլի ասուլիսից հետո, որտեղ Դանիայի վարչապետ Մետտե Ֆրեդերիկսենը և Գրենլանդիայի վարչապետ Նիլսենը ներկայացրեցին միասնական ճակատ։ «Եթե մենք ստիպված լինենք ընտրել Միացյալ Նահանգների և Դանիայի միջև այստեղ և հիմա, մենք ընտրում ենք Դանիան։ Մենք ընտրում ենք ՆԱՏՕ-ն։ Մենք ընտրում ենք Դանիայի Թագավորությունը։ Մենք ընտրում ենք ԵՄ-ն», - հայտարարել է Նիլսենը։
Թրամփը բազմիցս հայտարարել է Գրենլանդիան Միացյալ Նահանգներին միացնելու անհրաժեշտության մասին։ Նույնիսկ իր պաշտոնավարման առաջին ժամկետի ընթացքում նա առաջարկել էր գնել Գրենլանդիան, իսկ 2025 թվականի մարտին վստահություն էր հայտնել, որ այն կարող է անցնել ԱՄՆ-ի վերահսկողության տակ։