2 րոպեի ընթերցում
Քրդերի գլխավորած «Սիրիայի դեմոկրատական ուժեր» (ՍԴՈւ) խմբավորման դեմ հարվածների հետևանքով քաղաքացիական բնակչության շրջանում զոհերի թիվը հասել է 7-ի, իսկ վիրավորներինը՝ 52-ի, հայտնել է Հալեպի առողջապահության վարչության լրատվական ծառայության տնօրեն Մունիր ալ-Մուհամմադը։ «Արմենպրես»-ի փոխանցմամբ՝ այս մասին հաղորդում է սիրիական SANA գործակալությունը։
BBC-ն ավելի վաղ հայտնել էր 12 զոհի մասին։
Տեղեկությունների համաձայն՝ ՍԴՈւ-ն թիրախավորել է Հալեպի համալսարանի հանրակացարանը, Քաֆր Համրա բնակավայրը, Միդան թաղամասը, ինչպես նաև ալ-Ռազի հիվանդանոցը և Սուլեյման ալ-Հալաբի թաղամասում գտնվող Հալեպի ջրային վարչությունը։
Սիրիայի քաղաքացիական պաշտպանությունը հայտնել է, որ շտապօգնության կին աշխատակից է վիրավորվել Հալեպում տարհանման կետի մոտ գտնվող շտապօգնության մեքենային ուղղված դիպուկահարի կրակոցից։
Սիրիական բանակի և ՍԴՈւ-ի միջև Աշրաֆիե և Շեյխ Մակսուդ թաղամասերի մոտակայքում հրետակոծությունը շարունակվում է։
Հալեպում «Սիրիայի դեմոկրատական ուժերի» և սիրիական բանակի միջև բախումները սկսվել են հունվարի 6-ից։
Սիրիական բանակը կոչ է արել քաղաքացիական բնակչությանը հեռու մնալ ՍԴՈւ բոլոր դիրքերից՝ նշելով, որ պատրաստվում է թիրախային գործողություններ սկսել ՍԴՈւ-իէ Աշրաֆիե, Շեյխ Մակսուդ և Բանի Զեյդ թաղամասերում գտնվող դիրքերի ուղղությամբ։