Վենեսուելայում ԱՄՆ-ի գործողությունը սպառնում է մատակարարումների շղթայի կայունությանը. Չինաստանի ԱԳՆ
2 րոպեի ընթերցում
Վենեսուելայի նկատմամբ ԱՄՆ-ի ռազմական գործողությունը սպառնալիքի տակ է դրել մատակարարումների համաշխարհային շղթայի կայունությունը և լատինամերիկյան երկրի տնտեսական իրադրությունը: Ինչպես «Արմենպրես»-ը տեղեկանում է «ՌԻԱ Նովոստի» գործակալությունից, այդ մասին հունվարի 7-ին հայտարարել է Չինաստանի արտաքին գործերի նախարարության պաշտոնական ներկայացուցիչ Մաո Նինը։
ABC հեռուստաալիքը, հղում անելով Սպիտակ տան դիրքորոշմանը ծանոթ աղբյուրների, ավելի վաղ հաղորդել էր, որ ԱՄՆ-ն պահանջել է, որ Վենեսուելան համաձայնի ԱՄՆ-ի հետ բացառիկ նավթային գործընկերության և նախապատվությունը Վաշինգտոնին տա ծանր նավթի վաճառքի հարցում։
«Վենեսուելայի դեմ ուժի հանդուգն կիրառումը լրջորեն ազդել է Վենեսուելայի տնտեսական ու սոցիալական կարգի վրա և սպառնում է մատակարարումների համաշխարհային շղթայի կայունությանը. Չինաստանը խստորեն դատապարտում է դա», - ասել է Մաո Նինը։
Դիվանագետը, պատասխանելով այն հարցին, թե ինչպես է Պեկինը պլանավորում պաշտպանել իր էներգետիկ շահերը Վենեսուելայում, ընդգծել է, որ Չինաստանի և Վենեսուելայի միջև համագործակցությունը գործակցություն է ինքնիշխան պետությունների միջև, որը պաշտպանված է միջազգային իրավունքով և երկու երկրների օրենքներով։
Ավելի վաղ ԱՄՆ նախագահ Դոնալդ Թրամփը հայտարարել էր, որ Վենեսուելան 30-ից 50 միլիոն բարել նավթ կարտահանի ԱՄՆ։
Հունվարի 3-ին ԱՄՆ-ն հատուկ գործողություն էր իրականացրել և Վենեսուելայի նախագահ Նիկոլաս Մադուրոյին ու նրա կնոջը՝ Սիլիա Ֆլորեսին տեղափոխել ԱՄՆ՝ նրանց մեղադրելով թմրաահաբեկչության, ԱՄՆ կոկաինի մատակարարման և զենքի հետ կապված դավադրության համար: Նիկոլաս Մադուրոյին և նրա կնոջը մեղադրանքները ներկայացվել են Նյու Յորքի դատարանում։ Նրանք հերքել են մեղադրանքները։ Դատական հաջորդ նիստը կկայանա մարտի 17-ին։
Վենեսուելայի Գերագույն դատարանը պետության ղեկավարի պարտականությունները ժամանակավորապես փոխանցել է փոխնախագահ Դելսի Ռոդրիգեսին։