Ճանապարհային դեպարտամենտը վարորդներին հորդորում է երթևեկել բացառապես ձմեռային անվադողերով և վարել դանդաղ
2 րոպեի ընթերցում
«Ճանապարհային դեպարտամենտ» հիմնադրամը ճանապարհների ձմեռային պահպանման աշխատանքների մասին պարզաբանում է տարածել՝ վարորդներին հորդորելով լինել առավել զգոն, երթևեկել բացառապես ձմեռային անվադողերով։
«Արմենպրես»-ի փոխանցմամբ՝ դրանում, մասնավորապես, նշվում է, որ ձյան տեղումների ժամանակ ճանապարհները հնարավոր է մաքրել, երբ ձյան շերտի հաստությունը 3-4 սմ-ից ավելի է։
«Մաքրմանը հաջորդում են աղով, ավազով մշակման աշխատանքները։ Երկարատև ձյան տեղումների ժամանակահատվածում գործընթացը կատարվում է պարբերաբար։ Երբ ջերմաստիճանը նվազում է -7С°-ից, աղը կորցնում է հալոցք առաջացնելու իր հատկությունը և աղ-ավազային խառնուրդն ավելի ուշ է ներգործում։ -7С° և ավելի ցածր ջերմաստիճանի դեպքում օգտագործվում են ավազ և խարամ, որոնց տարածումը ձյան շերտի վրա ավելացնում է ավտոմեքենաների անվադողերի հպումը ճանապարհածածկույթին։ Եղանակային շատ ցածր ջերմաստիճանի դեպքում ճանապարհի սառցակալումը հնարավոր չէ կանխել»,-ասված է հիմնադրամի տարածած հաղորդագրության մեջ։
«Ճանապարհային դեպարտամենտը» վարորդներին հորդորում է լինել առավել զգոն, երթևեկել բացառապես ձմեռային անվադողերով։
«Վարեք դանդաղ, պահպանեք սովորականից առավել մեծ հեռավորություն դիմացի մեքենայից, ինչպես նաև մի խոչընդոտեք ձմեռային սպասարկում իրականացնող կապալառու կազմակերպությունների աշխատակիցների աշխատանքներին և հետևեք բոլոր հրահանգներին»,-նշված է հաղորդագրության մեջ։