2 րոպեի ընթերցում
Հռոմի Լևոն XIV պապը Սուրբ Պետրոսի հրապարակում հավատացյալներին ուղղված իր ավանդական Սուրբ ծննդյան ուղերձում հույս է հայտնել, որ Ռուսաստանի և Ուկրաինայի միջև ուղիղ և անկեղծ երկխոսություն կհաստատվի՝ հակամարտության կարգավորման համար։ Այդ մասին «Արմենպրես»-ը տեղեկանում է ՏԱՍՍ գործակալությունից:
«Մենք աղոթում ենք ուկրաինացի ժողովրդի համար. թող դադարի զինված դիմակայությունը, թող ներգրավված կողմերը միջազգային հանրության աջակցությամբ իրենց մեջ քաջություն գտնեն անկեղծ, ուղիղ և հարգալից երկխոսության մասնակցելու համար», - ասել է քահանայապետը Urbi et orbi («Քաղաքին և աշխարհին») ուղերձում։
Հռոմի կաթոլիկ եկեղեցու հովվապետը նաև միասնության կոչ է արել Եվրոպային՝ ընդհանուր քրիստոնեական արմատների և պատմության ոգով։
«Մեզ համար խաղաղությունը Հիսուս Քրիստոսի մեջ է։ Ամենից առաջ, որովհետև Նա ազատում է մեզ մեղքից, որովհետև Նա ցույց է տալիս մեզ հակամարտությունների՝ բոլոր հակամարտությունների՝ ինչպես միջանձնային, այնպես էլ միջազգային, հաղթահարման ուղին։ Առանց մեղքից ազատ սրտի, առանց ներման մենք չենք կարող լինել խաղաղություն կառուցողներ», - ասել է Հռոմի պապը։
Նա ավարտ է մաղթել բոլոր հակամարտություններին, մասնավորապես՝ Սուրբ Երկրում և Սիրիայում, ինչպես նաև «մոռացված հակամարտություններին» Աֆրիկայի երկրներում, և ավարտ՝ բոլոր ընչազուրկների տառապանքներին: