2 րոպեի ընթերցում
Մոսկվան և Կիևը գիշերը շարունակել են փոխադարձ հարվածները։ Ուկրաինան ՌԴ-ի ուղղությամբ արձակել է շուրջ 170 անօդաչու թռչող սարք, ռուսական հարվածներից Ուկրաինայում կան վիրավորներ։ «Արմենպրես»-ի փոխանցմամբ՝ այս մասին հայտնում է BBC-ի ռուսական ծառայությունը։
Ռուսաստանի պաշտպանության նախարարությունը հայտարարել է, որ հակաօդային պաշտպանության համակարգերը գիշերվա ընթացքում ուկրաինական 172 անօդաչու թռչող սարք են ոչնչացրել։
Հայտարարության համաձայն՝ Բրյանսկի մարզում խոցվել է 110 ԱԹՍ։ Նահանգապետ Ալեքսանդր Բոգոմազը նշել է, որ զոհեր կամ ավերածություններ չկան։
Մոսկվայի քաղաքապետ Սերգեյ Սոբյանինը հայտնել է, որ հակաօդային պաշտպանության ուժերը հետ են մղել մայրաքաղաքի վրա չորրորդ ԱԹՍ-ի հարձակումը։
Միևնույն ժամանակ, «Ռոսավիացիա»-ի ներկայացուցիչը հայտնել է, որ «Վնուկովո» օդանավակայանը սահմանափակումներ է մտցրել. չվերթերն ընդունվում և ուղարկվում են «համապատասխան մարմինների հետ համաձայնության դեպքում»։
Տուլայի մարզում խոցվել է 12 ուկրաինական ԱԹՍ, ձեռնարկություններից մեկում հրդեհ է բռնկվել։ Տուժածներ չկան։
Ուկրաինական կողմն էլ հաղորդել է գիշերը Զապորոժիեի մարզի ուղղությամբ ռուսական հարձակման մասին։ Երկու մարդ վիրավորվել է։ Վնասվել է առնվազն 13 բնակելի շենք, այրվել են ավտոտնակներ և մեքենաներ։
Կիևում և Ուկրաինայի այլ շրջաններում օդային տագնապ է հայտարարվել։
Ավելի վաղ Ուկրաինայի զինված ուժերի գլխավոր շտաբը հայտնել էր, որ ուկրաինացի զինվորականները նահանջել են Դոնեցկի մարզի Սևերսկ քաղաքից՝ զինծառայողների «կյանքի պահպանման և ստորաբաժանումների մարտունակության» նպատակով։ Ըստ ամերիկյան Պատերազմի ուսումնասիրման ինստիտուտի՝ ՌԴ զինված ուժերը 41 ամիս են ծախսել, որպեսզի Լիսիչանսկից դեպի արևմուտք 20 կմ առաջ գնան և գրավեն Սևերսկը։