Վենսը ռուս-ուկրաինական բանակցությունների ամենամեծ խնդիրը համարում է Դոնբասի վերահսկողության հարցը

Վաշինգտոնը ռուս-ուկրաինական հակամարտության հարցում յուրաքանչյուր կողմի պահանջների հստակ ըմբռնումը համարում է նշանակալի առաջընթաց։ «Արմենպրես»-ի փոխանցմամբ՝ այս մասին Unherd պարբերականին տված հարցազրույցում ասել է ԱՄՆ փոխնախագահ Ջեյ Դի Վենսը։

«Առաջընթացը, որին, ինչպես ես զգում եմ, մենք հասել ենք, կայանում է նրանում, որ բոլոր հարցերն այժմ քննարկվում են բացահայտ», - նշել է նա։

Վենսը նաև ընդգծել է, որ սկզբում «ինչ-որ խաղ էր ընթանում», հարցերը քննարկվում էին քողարկված ձևով։ Այժմ, նրա խոսքով, Վաշինգտոնը հստակ հասկանում է, թե որ հարցերն են բանակցելի, որոնք՝ ոչ։

Հարցին, թե ով է ներկայացնում խաղաղ կարգավորման հիմնական խոչընդոտը՝ Ուկրաինան, Ռուսաստանը, թե եվրոպական երկրները, Վենսը պատասխանել է, որ «դժվարություններ կան այդ բոլոր կողմերի հետ»։

ԱՄՆ փոխնախագահը հավելել է, որ ամենամեծ խնդիրը Դոնբասի տարածքի նկատմամբ վերահսկողությունն է, բայց մնում են նաև «ավելի փոքր խնդիրներ», ինչպիսիք են Զապորոժիեի ատոմակայանի նկատմամբ վերահսկողությունը, ինչպես նաև Ուկրաինայի վերակառուցումը։ Ընդ որում, ըստ Վենսի, ուկրաինացի բանակցողները մասնավոր զրույցներում ընդունում են, որ Դոնբասում մարտական ​​գործողությունների միջոցով չեն կարողանա տարածք պահել։

«Կարծում եմ, որ բոլորը, ովքեր մասնակցել են բանակցություններին, գոնե վերջին ամիսներին, դա արել են բարի կամքով», - ընդգծել է Վենսը։

Նա նշել է, որ հույս ունի խաղաղ կարգավորման, բայց նաև չի բացառել, որ դա կարող է տեղի չունենալ։

«Կարծում եմ՝ մենք առաջընթաց ենք գրանցել, բայց այսօր այստեղ նստած՝ վստահ չեմ լինի նրանում, որ մենք կհասնենք խաղաղ կարգավորման։ Կարծում եմ՝ մեծ հավանականություն կա, որ մենք կհասնենք դրան, բայց նաև կարծում եմ, որ մեծ հավանականություն կա, որ դրան չենք հասնի», - հայտարարել է Վենսը։

Դեկտեմբերի 20-ին և 21-ին ամերիկյան կողմը Ֆլորիդայում առանձին բանակցություններ է վարել ուկրաինական և ռուսական պատվիրակությունների հետ։ Տեղի են ունեցել նաև եռակողմ բանակցություններ եվրոպացի պաշտոնյաների մասնակցությամբ։ ԱՄՆ նախագահի հատուկ բանագնաց Սթիվ Ուիթքոֆը բանակցություններն անվանել է կառուցողական և արդյունավետ։