Ադրբեջանի ու Չեռնոգորիայի ԱԳ նախարարները քննարկել են Երևան-Բաքու հարաբերությունների կարգավորմանը վերաբերող հարցեր
2 րոպեի ընթերցում
Ադրբեջանի արտաքին գործերի նախարարը Ջեյհուն Բայրամովը Բաքվում հանդիպել է Չեռնոգորիայի փոխվարչապետ և արտաքին գործերի նախարար Էրվին Իբրահիմովիչի հետ։
«Արմենպրես»-ի հաղորդմամբ՝ այս մասին նշված է Ադրբեջանի ԱԳ նախարարության X-ի միկրոբլոգում տարածված գրառման մեջ։
«Ջեյհուն Բայրամովն իր գործընկերոջը տեղեկացրել է Ադրբեջանի և Հայաստանի միջև հարաբերությունների կարգավորման և կայուն խաղաղության ուղղությամբ գործադրվող ջանքերի մասին»,-ասված է գրառման մեջ։
Նշվում է, որ նախարարները քննարկել են երկկողմ հարաբերությունների ներկա վիճակը և ապագա հեռանկարները՝ ներառյալ քաղաքական երկխոսությունը, տնտեսական համագործակցությունը, հումանիտար կապերը և միջազգային հարթակներում ներգրավվածությունը։
Հաղորդվում է, որ հանդիպմանն ընդգծվել է առևտրի խթանման, ներդրումների խրախուսման, բիզնես-բիզնես կապերի ամրապնդման և համատեղ նախագծերի առաջխաղացման կարևորությունը։ Կողմերը շեշտել են Տնտեսական համագործակցության միջկառավարական համատեղ հանձնաժողովի արդյունավետ օգտագործումը։
Երկու կողմերն անդրադարձ են կատարել նաև տարածաշրջանային հարցերին։
Հայաստանն ու Ադրբեջանն օգոստոսի 8-ին Վաշինգտոնում նախաստորագրել են խաղաղության համաձայնագիրը։ Դրանից հետո թե՛ Հայաստանի վարչապետ Նիկոլ Փաշինյանը, թե Ադրբեջանի նախագահ Իլհամ Ալիևը հայտարարել են, որ երկու երկրների միջև խաղաղություն է հաստատվել։