Բանգլադեշում բողոքի ցույցեր են անցկացվում երիտասարդ առաջնորդի մահից հետո

Բանգլադեշում զանգվածային բողոքի ցույցեր են բռնկվել երիտասարդ քաղաքական ակտիվիստ Շարիֆ Օսման Հադիի մահից հետո, որը 2024 թվականին վարչապետ Շեյխ Հասինայի պաշտոնանկությանը հանգեցրած ցույցերի ականավոր երիտասարդ առաջնորդներից էր։ «Արմենպրես»-ի փոխանցմամբ՝ այս մասին հաղորդում է The Times of India-ն։

Հադին դեկտեմբերի 18-ին մահացել է Սինգապուրի հիվանդանոցում՝ դեկտեմբերի 12-ին Դաքքայում մահափորձի ժամանակ ստացած վնասվածքներից։

Հադիի մահվան լուրը տարածվելուն պես հազարավոր մարդիկ դուրս են եկել մայրաքաղաք Դաքքայի և երկրի այլ քաղաքների փողոցներ։ Նրանք մեղադրել են իշխանություններին Հադիին չպաշտպանելու համար։ 

Ցուցարարները հրդեհել և վանդալիզմի են ենթարկել երկու թերթերի՝ The Daily Star-ի և Prothom Alo-ի գրասենյակները։ Հրդեհվել է նաև նախկին իշխող «Ավամի Լիգա» կուսակցության գրասենյակը։

Ցուցարարները քարեր են նետել Բանգլադեշի Չիտագոնգ քաղաքում գտնվող Հնդկաստանի Բարձրագույն հանձնակատարի գրասենյակի վրա և Հնդկաստանի դեմ կարգախոսներ հնչեցրել: Նախկին վարչապետ Շեյխ Հասինան գտնվում է Հնդկաստանում։

Բանգլադեշի ժամանակավոր կառավարության ղեկավար, Նոբելյան մրցանակակիր Մուհամմադ Յունուսը հանգստության կոչ է արել: Նա Հադիի մահվան կապակցությամբ ազգային սգո օր է հայտարարել: Յունուսը նաև խոստացել է, որ նրա սպանության համար պատասխանատուները կգտնվեն և կպատժվեն:

 Բանգլադեշի անվտանգության ուժերը բերվել են բարձր պատրաստության վիճակի: