Երեխայի ծննդյան միանվագ նպաստը բոլորի դեպքում կսահմանվի 500 հազար դրամ․ԱԺ-ն քննարկում է նախագիծը
3 րոպեի ընթերցում
Հայաստանում նախատեսում են երեխայի ծննդյան միանվագ նպաստը բոլորի դեպքում՝ անկախ երեխայի կարգաթվից, սահմանել 500 հազար դրամ։
«Արմենպրես»-ի փոխանցմամբ՝ «Պետական նպաստների մասին» օրենքում փոփոխություններ և լրացումներ կատարելու մասին» օրենքի նախագիծն ԱԺ նիստում ներկայացրեց ՀՀ աշխատանքի և սոցիալական հարցերի փոխնախարար Դավիթ Խաչատրյանը։
«Առաջարկում ենք ընտանիքում ծնված 3-րդ և հաջորդ յուրաքանչյուր երեխային՝ այսօրվա դրությամբ կառավարության կողմից տրվող աջակցությունը դարձնել պետական նպաստ։ Ծրագիրն ունեցել է դրական արդյունքներ»,-ասաց Խաչատրյանը։
Նա հիշեցրեց՝ ծրագրի նպատակն այն է եղել, որ ընտանիքում երրորդ և հաջորդ կարգաթվով երեխաների ծնունդները շատանան Հայաստանում։ Դա տեղի է ունեցել։ 2018-ին ընտանիքում երրորդ և հաջորդ կարգաթվով ծնված երեխաների թիվը կազմել է շուրջ 8300, 2023-ին կազմել է 12 400-ից ավելի, 2024-ին՝ 12 հազար։
«Քանի որ երրորդ և հաջորդ երեխա ունեցող ընտանիքների համար աջակցության ծրագիրը դառնում է պետական նպաստ, մենք միաժամանակ առաջարկում ենք ծննդյան միանվագ նպաստի չափերի հետ կապված կատարել համահարթեցում։ Այսօրվա դրությամբ 1-ին և 2-րդ երեխաների համար տրվող 300 հազար դրամները, 3-րդ և 4-րդի համար տրվող 1 մլն դրամները, 5-րդ և հաջորդի համար տրվող 1.5 մլն դրամների փոխարեն բոլորի համար սահմանել նույն չափը՝ 500 հազար դրամ»,-ասաց Խաչատրյանը։
Միանվագ ծննդյան նպաստից և երրորդ ու յուրաքանչյուր հաջորդ երեխայի նպաստից կարող են օգտվել միայն այն դեպքում, երբ երեխան ՀՀ քաղաքացի է։ Քաղաքացիության պահանջը կկիրառվի 2026թ հունվարի 1-ից, իսկ համահարթեցման տրամաբանությունը՝ 2026թ սեպտեմբերի 1-ից։
Նախագծերի փաթեթով ներկայացված մյուս առաջարկը կապված է պետական կենսաթոշակների և նպաստների վճարման հետ։ «Խոսքը վերաբերում է անկանխիկի անցման տրամաբանությամբ կենսաթոշակների և նպաստների ամբողջությամբ անկանխիկ եղանակով վճարմանը։ Նախատեսում ենք, որ այն կգործի 2026 թվականին ապրիլի 1-ից»,-ասաց Խաչատրյանը։
Ավելի քան 660 հազար կենսաթոշակ և նպաստ ստացող քաղաքացիներից շուրջ 58 հազարն են, որ ստանում են կանխիկ եղանակով, նրանց համար կառավարությունը կսահմանի սահուն անցման մեխանիզմներ՝ այնպես, որ ապրիլի 1-ից բոլոր վճարումները կկատարեն անկանխիկ եղանակով։