1 րոպեի ընթերցում
Տեխնոլոգիական ոլորտի ամերիկյան աշխարհահռչակ Oracle ընկերության համահիմնադիր Լարի Էլիսոնը մեկ օրում շուրջ 25 մլրդ դոլար է կորցրել ընկերության ակցիաների անկման պատճառով։ «Արմենպրես»-ի փոխանցմամբ, ինչպես հայտնում է ՌԻԱ Նովոստին, այս մասին նշված է Bloomberg-ի հրապարակած ինդեքսում։
Oracle-ի արժեթղթերը նախօրեին նվազել են 11 տոկոսով, հասնելով 1 հատի համար 198,85 դոլարի։ Այսօր անկումը շարունակվել է մինչև 197,1 դոլարի։
Արժեթղթերի անկման պատճառն ընկերության ներկայացրած ֆինանսական հաշվետվությունն է։ Ներդրողներին չի գոհացրել այն հանգամանքը, որ տարվա վերջին կիսամյակի համար ընկերության եկամուտը պակաս է եղել ակնկալվող թվից։
25 մլրդ դոլար կորցնելուց հետո Էլիսոնի կարողությունը գնահատվել է 258 մլրդ դոլար և նա աշխարհի ամենահարուստ մարդկանց սանդղակում երկրորդ հորիզոնականը զիջել է Google-ի հիմնադիր Լարի Փեյջին, ում կարողությունը գնահատվում է 268 մլրդ դոլար։
Առաջին հորիզոնականում շարունակում է լինել Tesla-ի հիմնադիր Իլոն Մասկը՝ 462 մլրդ դոլար կարողությամբ։
Oracle ընկերությունը հիմնադրվել է 1977թ. ԱՄՆ-ում: Ընկերությունն ունի ավելի քան 390 հազար գնորդ, իսկ ծրագրերը ներկայացված են աշխարհի ավելի քան 145 երկրում: