3 րոպեի ընթերցում
Հայաստանի վարչապետ Նիկոլ Փաշինյանն ու Գերմանիայի կանցլեր Ֆրիդրիխ Մերցը հանդիպմանը քննարկել են միջազգային օրակարգի հրատապ հարցեր։
Ինչպես հաղորդում է «Արմենպրես»-ի թղթակիցը Գերմանիայից, համատեղ մամուլի ասուլիսում ՀՀ վարչապետ Նիկոլ Փաշինյանը նշեց, որ գործընկերոջ հետ համակարծիք են` աննախադեպ մարտահրավեր ունեցող այս ժամանակաշրջանում ժողովրդավարությունները բախվում են արագ տարածվող և հաճախ հիբրիդային բնույթ ունեցող սպառնալիքների, ու միայն համախոհ երկրների առավել համակարգված և արդյունավետ գործողությունների շնորհիվ հնարավոր կլինի ամրապնդել հավաքական ժողովրդավարական դիմակայությունը։
«Իմ այցի օրակարգում կարևոր տեղ է հատկացված տնտեսական կապերի ստեղծմանը և ամրապնդմանը։ Այս առումով մեծ հույս ունեմ, որ Հայաստանում և Հայաստանի շուրջ ստեղծված բարենպաստ միջավայրը նոր հետաքրքրություն կառաջացնի գերմանացի գործարարների շրջանում մեր երկրում ներդրումներ անելու, ինչպես նաև՝ հայաստանյան գործարարների հետ համագործակցությունը ակտիվացնելու համար։ Գործընկերոջս ներկայացրել եմ նաև 2025 թվականի օգոստոսի 8-ի Վաշինգտոնի խաղաղության գագաթաժողովի արդյունքում Հարավային Կովկասում տեղի ունեցած շրջադարձային զարգացումները՝ շնորհակալություն հայտնելով Հայաստանի և Ադրբեջանի միջև խաղաղության ինստիտուցիոնալացմանն ուղղված ջանքերին Գերմանիայի աջակցության համար», - ասաց վարչապետը։
Նիկոլ Փաշինյանը նշեց, որ գործընկերոջը ներկայացրել է նաև Հարավային Կովկասում տարածաշրջանային հաղորդակցության ուղիների ապաշրջափակման պայմաններում առևտրատնտեսական գործարար կապերի զարգացման, ենթակառուցվածքների ոլորտներում համագործակցության ընդլայնման համար բացվող լայն հնարավորությունները և այդ առումով Խաղաղության խաչմերուկ նախագծի, ինչպես նաև TRIPP ուղի հաղորդակցության ծրագրերի կյանքի կոչմանն ուղղված ջանքերի կարևորությունը։
«Վստահ եմ, որ մեր այս նախագծերը կարևոր հանգույց կդառնան Միջին միջանցքի համար, որը Գերմանիայի համար նույնպես ունի մեծ կարևորություն», - ասաց ՀՀ վարչապետը` ընդգծելով, որ Գերմանիան Հայաստանի կարևոր գործընկերն է ինչպես երկկողմ մակարդակում, այնպես էլ Հայաստան-Եվրամիություն գործընկերության շրջանակում։
Այս առումով երկուստեք գոհունակությամբ կողմերն արձանագրել են Հայաստան֊Եվրամիություն հարաբերություններում վերջին տարիներին արձանագրված զգալի առաջընթացը, ինչը վերահաստատում է Հայաստանի կառավարության հանձնարարությունը՝ ամրապնդելու Եվրամիության հետ բազմաոլորտ գործընկերությունը։
Նիկոլ Փաշինյանը տեղեկացրեց, որ Գերմանիայի կանցլերին հրավիրել է մասնակցելու հաջորդ տարվա մայիսին Երևանում կայանալիք Եվրոպական քաղաքական համայնքի գագաթաժողովին։