Քննչական կոմիտեն մանրամասներ է հայտնում Արշակ արքեպիսկոպոս Խաչատրյանին ձերբակալելու լուրերի առնչությամբ

ՀՀ քննչական կոմիտեն, ի պատասխան՝ Մայր Աթոռի դիվանապետ Արշակ արքեպիսկոպոս Խաչատրյանին ձերբակալելու վերաբերյալ փաստաբան Արսեն Բաբայանի հայտարարության առնչությամբ «Արմենպրես»-ի հարցմանը, հայտնել է.

«Քրեական վարույթի նախաքննության ընթացքում անձի նկատմամբ հարուցվել է հանրային քրեական հետապնդում՝ Քրեական օրենսգրքի 393-րդ հոդվածի 2-րդ մասի 1-ին և 4-րդ կետերով (մի խումբ անձանց կողմից նախնական համաձայնությամբ թմրամիջոց ապօրինի իրացնելը՝ հանդիսադիր վայրում)»:

Դեկտեմբերի 4-ին փաստաբան Բաբայանը հայտնել էր, որ հոգևորականին ձերբակալել է ՀՀ ազգային անվտանգության ծառայությունը Քննչական կոմիտեի շենքում:

Հիշեցնենք՝ «Հայկական Վիկիլիքս» անվանմամբ տելեգրամյան ալիքը հոկտեմբերի 25-ին հրապարակել է ինտիմ բնույթի տեսագրություն, որը վերագրվում է Արշակ արքեպիսկոպոս Խաչատրյանին: «Իրազեկ քաղաքացիների միավորում» ՀԿ-ն գլխավոր դատախազություն հաղորդում էր ուղարկել՝ նշելով, որ նրա անձնական կյանքի գաղտնիությունը ենթադրաբար կոպիտ կերպով խախտվել է։ Դատախազությունն այն փոխանցել էր Քննչական կոմիտե։ Քննչական կոմիտեն հետագայում հայտնել էր, որ դատատեսաձայնագրային և դիմանկարային փորձաքննությամբ հաստատվել է, որ տեսանյութերում պատկերված անձը հենց Արշակ արքեպիսկոպոս Խաչատրյանն է։