Վրաստանում կստուգեն բողոքի ցույցերի ժամանակ ուժային կառույցների կողմից քիմիական նյութեր օգտագործելու մասին տեղեկատվությունը

Վրաստանի Պետական ​​անվտանգության ծառայությունը հետաքննություն է սկսել բրիտանական BBC կորպորացիայի հրապարակման կապակցությամբ, ըստ որի վրացի իրավապահները 2024 թվականի նոյեմբեր-դեկտեմբեր ամիսներին թունավոր քիմիական նյութեր են կիրառել Թբիլիսիում տեղի ունեցած ընդդիմության հանրահավաքները ցրելու համար։ «Արմենպրես»-ի հաղորդմամբ՝ այս մասին հաղորդագրություն է տարածել վերոնշյալ ծառայությունը։

Հետաքննության նպատակն է մանրամասնորեն պարզել, թե ինչ տեղեկատվության են հղում կատարել BBC-ի թղթակիցները քիմիական նյութերի օգտագործման մասին հաղորդելիս։

«Այս պահին մենք կարող ենք ասել միայն, որ մի կողմից տարածված նյութերը պարունակում են հանցագործության տարրեր, որոնք հաստատման պարագայում կարող էին ուղղված լինել քաղաքացիների կյանքի և առողջության դեմ, իսկ մյուս կողմից՝ առկա են Վրաստանի ազգային շահերին և նրա միջազգային հեղինակությանը լուրջ վնաս հասցնող հանցագործության տարրեր»,- նշված է հաղորդագրությունում։

Իշխող «Վրացական երազանք» կուսակցությունը դեկտեմբերի 1-ին հայտարարել է, որ BBC-ի դեմ դատական ​​հայցեր են ներկայացվելու միջազգային դատարաններ՝ չհաստատված տեղեկատվություն տարածելու համար։

Օրեր առաջ BBC-ն հաղորդել էր, որ իր հավաքած ապացույցները վկայում են այն մասին, որ Թբիլիսիում Վրաստանի կառավարությունն Առաջին համաշխարհային պատերազմի ժամանակաշրջանի քիմիական զենք է օգտագործել ցուցարարների դեմ։