Սիրիան, ՄԱԿ-ը և մի շարք երկրներ դատապարտել են Իսրայելի հարձակումը Դամասկոսի շրջանի վրա

Սիրիան խստորեն դատապարտել է նոյեմբերի 28-ին իսրայելական բանակի կողմից իրականացված հարձակումը Դամասկոսի շրջանի Բեյթ Ջին բնակավայրի վրա։ «Արմենպրես»-ի փոխանցմամբ՝ այս մասին հայտնում է սիրիական SANA գործակալությունը։

Սիրիայի արտաքին գործերի և արտագաղթողների նախարարությունը տեղի ունեցած հարձակումը որակել է «պատերազմական հանցագործություն»:

«Սիրիայի Արաբական Հանրապետությունն Իսրայելի օկուպացիոն իշխանություններին լիովին պատասխանատու է համարում այս լուրջ ագրեսիայի, դրա հետևանքով զոհերի և ավերածությունների համար: Այս հանցավոր հարձակումների շարունակությունը համարվում է տարածաշրջանում անվտանգությանը և կայունությանը սպառնալիք և իրավիճակը անկայունացնելու և ուժով ագրեսիվ իրականություն պարտադրելու համակարգված քաղաքականության մաս», - նշվում է հաղորդագրության մեջ:

Սիրիան կոչ է արել ՄԱԿ-ին, ՄԱԿ Անվտանգության խորհրդին և Արաբական պետությունների լիգային՝ անհապաղ միջոցներ ձեռնարկել՝ վերջ դնելու Իսրայելի կողմից սիրիացի ժողովրդի դեմ իրականացվող ագրեսիվ քաղաքականությանը։

Սիրիայում ՄԱԿ-ի հատուկ բանագնացի տեղակալ Նաջաթ Ռոչդին դատապարտել է Բեյթ Ջին բնակավայրում Իսրայելի ագրեսիան՝ ընդգծելով, որ նման ագրեսիայի գործողությունները Սիրիայի ինքնիշխանության և տարածքային ամբողջականության «լուրջ և անընդունելի խախտում են» և ավելի են անկայունացնում տարածաշրջանում իրավիճակը։ Ռոչդին վերահաստատել է ՄԱԿ-ի անսասան հանձնառությունը Սիրիայի ինքնիշխանությանը, միասնությանը, անկախությանն ու տարածքային ամբողջականությանը՝ կոչ անելով անհապաղ դադարեցնել հարձակումները։

Կատարի և Հորդանանի արտաքին գործերի նախարարությունները խստորեն դատապարտել են իսրայելական ուժերի կողմից Դամասկոսի շրջանում իրականացված ներխուժումը՝ այն համարելով «Սիրիայի ինքնիշխանության և միջազգային ու մարդասիրական իրավունքի կոպիտ խախտում»։

Իսրայելական ուժերի կողմից Դամասկոսի շրջանի Բեյթ Ջին բնակավայրի թիրախավորման հետևանքով զոհվել է 13, վիրավորվել` 25 մարդ։