ԵՄ երկրները կարող են առաջիկա 10 տարիներին ռազմական կարիքներին հատկացնել 6,8 տրիլիոն եվրո

Եվրամիության երկրները կարող են առաջիկա 10 տարվա  ընթացքում ռազմական կարիքների համար ծախսել 6,8 տրիլիոն եվրո։ «Արմենպրես»-ի փոխանցմամբ՝ այս մասին հայտարարել է ԵՄ պաշտպանության հարցերով հանձնակատար Անդրյուս Կուբիլյուսը Եվրախորհրդարանում կայացած լսումների ժամանակ։

«Եթե ԵՄ երկրները մինչև 2035 թվականն իրենց ռազմական ծախսերը մեծացնեն մինչև ՀՆԱ-ի 3,5%-ը, ինչպես դա պահանջում է ՆԱՏՕ-ն (խմբ.՝ ՆԱՏՕ-ի ՀՆԱ-ի 5%-ի պահանջը ներառում է ՀՆԱ-ի 3,5%-ը բուն ռազմական կարիքների համար և 1,5%-ը՝ կրկնակի նշանակության ենթակառուցվածքային նախագծերի համար), ապա առաջիկա 10 տարվա ընթացքում ռազմական ոլորտում նրանք կներդնեն 6,8 տրիլիոն եվրո», - նրա խոսքերն է մեջբերում ՏԱՍՍ գործակալությունը։ 

«Համեմատության համար՝ ԵՄ-ի հաջորդ յոթամյա բյուջեի պլանում (2026-2034 թթ.) ռազմական ծախսերն ամրագրված են 60 միլիարդ եվրոյի մակարդակում։ Դա արտացոլում է Եվրոպայում ռազմական ծախսերի կառուցվածքը, որոնք մնում են գլխավորապես ազգային։ ԵՄ երկրները պաշտպանության բնագավառում ներդնում են 100 անգամ ավելի, քան ԵՄ (կառույցները)», - հավելել է նա։

Փորձագետների կարծիքով՝ ԵՄ կառույցները և ՆԱՏՕ-ն արագորեն ընդլայնում են ազգային ռազմական ծախսերի վրա ազդելու և դրանք վերահսկելու իրենց հնարավորությունները: Մինչև 2024 թ. նոյեմբերին Կուբիլյուսի նշանակումը ԵՄ պաշտպանության հարցերով հանձնակատարի պաշտոնում, Եվրահանձնաժողովում նման պաշտոն գոյություն չի ունեցել: