2 րոպեի ընթերցում
Հնդկաստանում ձերբակալվել է 9 մարդ 70 միլիոն ռուփի (գրեթե 800 000 դոլար) գողանալուց հետո։ Կողոպուտի ընթացքում զինված տղամարդիկ ներկայացել էին որպես պահուստային բանկի պաշտոնյաներ և թալանել ինկասացիայի մեքենան։ «Արմենպրես»-ի փոխանցմամբ՝ այս մասին հաղորդում է BBC-ն։
Նոյեմբերի 24-ին Բենգալուրու քաղաքի ոստիկանությունը ձերբակալել է ևս 2 հոգու. 7 կասկածյալ ձերբակալվել էր ավելի վաղ։ Վերադարձվել է անցյալ շաբաթ գողացված գումարից 68,5 միլիոն ռուփի։
Հետաքննությունը շարունակվում է։
Կողոպտիչները ձևացել էին, թե Հնդկաստանի պահուստային բանկի աշխատակիցներ են։ Նրանք կանգնեցրել էին տրանսպորտային միջոցը՝ ասելով, որ պետք է ստուգեն այդքան մեծ գումարի տեղափոխման փաստաթղթերը։
Ըստ ոստիկանության՝ մեքենայում կանխիկ գումարը հսկող աշխատակցին և երկու անվտանգության աշխատակիցներին հրահանգվել է նստել ամենագնաց մեքենա, մինչ ավազակախմբի անդամներից մեկը վերահսկողություն է հաստատել կանխիկ գումար տեղափոխող մեքենայի նկատմամբ։
Ոստիկանությունը հայտնել է, որ ավազակախումբը փոխել է մեքենաները, օգտագործել կեղծ համարանիշներ և ընտրել է նվազագույն տեսախցիկներով վայրեր՝ կանխիկ գումարով արկղերը տեղափոխելու համար։
Նոյեմբերի 19-ից մի քանի նահանգում սկսվել է լայնածավալ հետապնդում, որին մասնակցել է ավելի քան 200 ոստիկան։