Ռոմանոս Պետրոսյանը կշարունակի պաշտոնավարել որպես ՀԷՑ-ի ժամանակավոր կառավարիչ

Ռոմանոս Պետրոսյանը կշարունակի իրականացնել «Հայաստանի էլեկտրական ցանցեր» ընկերության ժամանակավոր կառավարչի իր պարտականությունները մինչև այն պահը, երբ պետությունը առաջիկա երեք ամիսների ընթացքում որոշում կկայացնի, թե ինչ ուղղությամբ է շարունակելու ՀԷՑ-ի հետագա կառավարումը։ «Արմենպրես»-ի հաղորդմամբ՝ այս մասին հայտնում են ՀՀ Հանրային ծառայությունները կարգավորող հանձնաժողովից։

Ավելի վաղ, ՀԾԿՀ-ն ընդունել էր ՀԷՑ-ի լիցենզիան դադարեցնելու որոշում։ ՀԷՑ-ի շուրջ գործընթացը սկսվել էր դեռևս 2025 թվականի հունիսի 18-ին, երբ վարչապետ Նիկոլ Փաշինյանը հայտնել էր, որ հասունացել է ՀԷՑ-ը պետականացնելու պահը։

2025 թվականի հուլիսին Հայաստանի խորհրդարանը երկրորդ ընթերցմամբ և ամբողջությամբ ընդունեց ՀԷՑ-ի պետականացմանը միտված օրենսդրական նախաձեռնությունը, որով Հանրային ծառայությունները կարգավորող հանձնաժողովին տրվել էին նոր լիազորություններ։ Մասնավորապես, օրենքով սահմանվել է՝ եթե լիցենզավորված կազմակերպության գործունեությունն ունի բարձր ռիսկայնություն, կառավարության լիազոր մարմինը կարող է հաղորդում ներկայացնել, հնարավոր դարձնել կանխարգելիչ միջոցների կիրառումը մինչ վարույթի հարուցումը, հստակեցնել այդ միջոցների տեսակները, կիրառման կարգը և իրավաչափության պայմանները։  

Հուլիսի 18-ին Հանրային ծառայությունները կարգավորող հանձնաժողովի նախագահ Մեսրոպ Մեսրոպյանի որոշմամբ՝ Ռոմանոս Պետրոսյանը նշանակվել է ՀԷՑ-ի ժամանակավոր կառավարիչ։ 

ՀԷՑ-ի սեփականատերը «Տաշիր Կապիտալ» ընկերությունների խումբն է, որը ՀԷՑ-ում ժամանակավոր կառավարիչ նշանակելու որոշումը վիճարկել էր Ստոկհոլմի արբիտրաժային դատարանում։