1 րոպեի ընթերցում
Ֆիլիպինների հյուսիսում մոլեգնող թայֆունի հետևանքով մահացել է երկու մարդ, վիրավորվել ևս երկուսը։ Ինչպես հաղորդում է «Արմենպրես»-ը, այս մասին հայտնում է Reuters-ը։
Ֆունգ-վոնգ անունով հայտնի թայֆունի պատճառով շուրջ մեկ միլիոն մարդ է տարհանվել իրենց բնակավայրերից։ Սուպեր թայֆունը նոյեմբերի 9-ի ամբողջ գիշեր հարվածել է երկրի գլխավոր կղզուն՝ Լուսոնին ուժեղ քամիներով, հորդառատ անձրևներով և փոթորկոտ ալիքներով։
Թայֆունը տապալել է ծառեր և էլեկտրականության սյուներ։ Տեղումների առաջացրած սողանքների և ճանապարհների քանդման հետևանքով առնվազն երեք գյուղ կտրվել է արտաքին աշխարհից։
Իշխանություններն այս պահին վնասի գնահատման աշխատանքներ են իրականացնում։
Հայտնի է, որ նոյեմբերի 9-ից Ֆիլիպիններում չեղարկվել է շուրջ 400 թռիչք։
Ֆունգ-վոնգ թայֆունը 21-րդն էր այս տարի Ֆիլիպիններում։ Դրան անմիջապես նախորդել էր Կալմաեգի թայֆունը, որի հետևանքով երկրում զոհվել էր 224 մարդ։