368.52
1 րոպեի ընթերցում
Երևանի քաղաքապետարանի նախաձեռնությամբ իրականացվող «Արտիստը՝ դպրոցին» ծրագրի 2025 թվականի աշնանային շրջափուլի ընթացքում Երևանի ենթակայության արվեստի, կերպարվեստի և երաժշտական դպրոցներում վարպետության դասերով հանդես կգա անվանի գեղանկարիչ, ՀՀ ժողովրդական նկարիչ Հրանտ Թադևոսյանը (Թաթոս)։ «Արմենպրես»-ի հաղորդմամբ՝ այս մասին տեղեկացրին Երևանի քաղաքապետարանից։
Վարպետության դասերը կնախաձեռնվեն նոյեմբերի 14-ից և կշարունակվեն մինչև դեկտեմբերի 26-ը։ Դասընթացների ընթացքում ուսանողները հնարավորություն կունենան անմիջապես շփվելու ճանաչված նկարչի հետ, ծանոթանալու նրա ստեղծագործական մոտեցումներին և ձեռք բերելու մասնագիտական հմտություններ։
Ծրագիրը կեզրափակվի Հայաստանի նկարիչների միությունում նախատեսվող ցուցահանդեսով, որտեղ կներկայացվեն վարպետության դասերի ընթացքում առանձնապես աչքի ընկած սովորողների աշխատանքները։ Ցուցահանդեսի շրջանակում նաև տեղի կունենա ծրագրի պատկերագրքի շնորհանդեսը։