2 րոպեի ընթերցում
«Բուրեվեստնիկ»-ի փորձարկումների ժամանակ ՆԱՏՕ-ի հետախուզական նավը գտնվել է փորձարկումների գոտում, ուստի արտասահմանյան մասնագետները կարող էին համոզվել հրթիռի թռիչքի հեռահարության և դրա կողմից թիրախի խոցման ճշգրտության հարցում: Ինչպես «Արմենպրես»-ը տեղեկանում է «Ինտերֆաքս» գործակալությունից, այդ մասին հայտարարել է ՌԴ նախագահ Վլադիմիր Պուտինը։
«Թռիչքի հեռահարության առումով «Բուրեվեստնիկ»-ը, ինչպես հայտնի է, գերազանցել է աշխարհում հայտնի բոլոր հրթիռային համակարգերին։ Այն ունի թիրախի խոցման բարձր ճշգրտություն, որին ճշտորեն և վստահորեն հասնում է նախապես հաշվարկված ժամանակում», - ասել է Պուտինը «Բուրեվեստնիկ»-ի և «Պոսեյդոն»-ի մշակողների պարգևատրման արարողության ժամանակ։
Նա նշել է, որ դրանում կարողացել են համոզվել արտասահմանյան մասնագետները, «քանի որ ՆԱՏՕ-ի հետախուզական նավը հոկտեմբերի 21-ին «Բուրեվեստնիկ»-ի փորձարկումների ժամանակ մշտապես գտնվել է փորձարկումների գոտում»։
«Մենք չենք միջամտել դրա աշխատանքին։ Թող տեսնեն», - պարզաբանել է ՌԴ ղեկավարը։
«Հատուկ կնշեմ հրթիռի հզոր, գերփոքր միջուկային ռեակտորների բացառիկ ռեժիմը։ Աշխատանքի գործարկումը չափվում է վայրկյաններով, մինչդեռ սովորական ռեակտորների համար պահանջվում են ժամեր և նույնիսկ օրեր», - ընդգծել է Պուտինը։
Հոկտեմբերի 26-ին Ռուսաստանի նախագահ Վլադիմիր Պուտինին զեկուցել են «Բուրեվեստնիկ» թևավոր հրթիռի հաջող փորձարկման մասին: «Բուրեվեստնիկ»-ը կարող է միջուկային մարտագլխիկ կրել և, ըստ Մոսկվայի, կարող է շրջանցել պաշտպանական ցանկացած համակարգ: «Բուրեվեստնիկ»-ը երկնքում է եղել շուրջ 15 ժամ՝ անցնելով 14 000 կմ, և դա, ըստ Մոսկվայի, դրա հնարավորությունների սահմանը չէ: