Նախարարը Դոհայում ներկայացրել է աղքատության վերացման, աշխատանքի ապահովման ուղղությամբ ՀՀ հիմնական նախաձեռնությունները
1 րոպեի ընթերցում
Աշխատանքի և սոցիալական հարցերի նախարար Արսեն Թորոսյանը ՀՀ նախագահ Վահագն Խաչատուրյանի գլխավորած պատվիրակության կազմում աշխատանքային այցով գտնվում է Կատարի Պետության մայրաքաղաք Դոհայում՝ մասնակցելու Սոցիալական զարգացման երկրորդ համաշխարհային գագաթաժողովին:
«Արմենպրես»-ի հաղորդմամբ՝ այս մասին հայտնում են Աշխատանքի և սոցիալական հարցերի նախարարությունից:
Նախարարը մասնակցել է աղքատության վերացման, լիարժեք և արդյունավետ զբաղվածության և արժանապատիվ աշխատանքի ապահովման թեմայով կլոր-սեղան քննարկմանը, որտեղ հանդես է եկել ելույթով։
Նախարար Թորոսյանը մասնավորապես նշել է, որ աղքատության վերացումը, արժանապատիվ աշխատանքի ապահովումն ու սոցիալական ներառման խթանումը պետք է դիտարկվեն որպես մեկ միասնական ռազմավարության բաղադրիչներ՝ ուղղված յուրաքանչյուր մարդու արժանապատիվ կյանքի իրավունքի և բարեկեցության ապահովմանը։
Նախարարը ներկայացրել է այս ուղղությամբ Հայաստանի հիմնական նախաձեռնությունները՝ աշխատանքային պայմանագրերի թվայնացում, ընտանիքների անապահովության գնահատման նոր համակարգ, կանանց տնտեսական հզորացում և գենդերային հավասարության ապահովում։