Վանաձորում Թումո կենտրոն կբացվի. կառավարությունը հաստատեց գույքի նվիրաբերման նախագիծը

Վանաձոր քաղաքում Թումո ստեղծարար կենտրոն կհիմնվի:

«Արմենպրես»-ի փոխանցմամբ՝ այս նպատակով գույքի նվիրաբերման նախագիծն ընդունվեց կառավարության հոկտեմբերի 30-ի նիստում:

Տարածքային կառավարման և ենթակառուցվածքների նախարար Դավիթ Խուդաթյանը հայտնեց՝ «Սիմոնյան կրթական հիմնադրամ»-ին կենտրոնի բացման համար նվիրաբերվում է Վանաձորի Թատերական փողոցի 1/1 սպայի տուն հասցեում գտնվող անշարժ գույքը: 

«Ծրագրի իրականացման նպատակով հիմնադրամն առաջիկա 3 տարիներին պատրաստվում է 1 մլրդ 800 մլն դրամի ներդրում իրականացնել այս տարածքում»,- ասաց Խուդաթյանը: 

Կրթության, գիտության, մշակույթի և սպորտի նախարարի տեղակալ Արթուր Մարտիրոսյանը նշեց, որ այժմ հանրապետության ամբողջ տարածքում գործում է 6 Թումո կենտրոն, առաջիկայում նախատեսվում է Թումո կենտրոններ բացել նաև Էջմիածին, Մասիս, Արմավիր, Աբովյան, Աշտարակ, Մարտունի և Սիսիան քաղաքներում: