ՀՀ ԱԽ քարտուղարը Օդրոն Պերկաուսկիենեի և Ադրիեն Կիրալի հետ քննարկել է ընթացիկ ծրագրերը
1 րոպեի ընթերցում
Հայաստանի Հանրապետության անվտանգության խորհրդի քարտուղար Արմեն Գրիգորյանն ընդունել է Արտաքին գործողության եվրոպական ծառայության՝ Արևելյան Եվրոպայի և Ռուսաստանի հարցերով կառավարող տնօրենի տեղակալ Օդրոն Պերկաուսկիենեի և Եվրոպական հանձնաժողովի Հարևանության և ընդլայնման բանակցությունների գլխավոր տնօրինության՝ Արևելյան հարևանության և ինստիտուցիոնալ զարգացման տնօրեն Ադրիեն Կիրալի գլխավորած պատվիրակությանը:
ԱԽ քարտուղարը ողջունել է պատվիրակության այցը Հայաստան և կարևորել ընդհանուր արժեքների վրա հիմնված ՀՀ-ԵՄ գործընկերությունը:
«Արմենպրես»-ի փոխանցմամբ՝ ԱԽ գրասենյակից հայտնում են, որ պատվիրակության անդամների խնդրանքով Արմեն Գրիգորյանը ներկայացրել է օգոստոսի 8-ին Վաշինգտոնում ստորագրված համատեղ հռչակագիրը, տարածաշրջանային կապուղիների ապաշրջափակման արդյունքում ընձեռվելիք տնտեսական լայն հնարավորություններն ու Հայաստան-Ադրբեջան հարաբերությունների կարգավորման գործընթացի վերջին զարգացումները:
Հանդիպման ընթացքում զրուցակիցները մտքեր են փոխանակել երկկողմ համագործակցության օրակարգի շուրջ և քննարկել ընթացիկ ծրագրերը: