4 րոպեի ընթերցում
Ամփոփվել են Team Telecom Armenia-ի տեխնոլոգիական գործընկերությամբ անցկացվող Koreez մրցանակաբաշխության արդյունքները: Այս տարի առարկայական ծրագրերի և հատուկ ընտրված թեմաների հիման վրա ստեղծված ինտելեկտուալ մրցույթին մասնակցել է շուրջ 25 000 աշակերտ Հայաստանի Հանրապետության դպրոցներից:
«Կրթության ոլորտում կատարված յուրաքանչյուր ներդրում ներդրում է մեր երկրի ապագայում: Այդ է պատճառը, որ ոլորտի աջակցությունը մեզ համար՝ որպես հայկական օպերատոր, ռազմավարական նշանակություն ունի: Մենք կարևորում ենք, որ որակյալ կրթությունը հասանելի լինի յուրաքանչյուր երեխայի, նպաստի նոր գիտելիքների ձեռքբերմանն ու օգնի աշակերտներին բացահայտելու և էլ ավելի զարգացնելու իրենց տաղանդները»,-ասում է Team Telecom Armenia-ի գլխավոր տնօրեն Հայկ Եսայանը:
Team-ը նաև մրցանակներ է տրամադրել մրցույթում հաղթանակներ գրանցած երեք աշակերտների՝ նպատակ ունենալով նպաստելու նորագույն տեխնոլոգիաների կիրառման միջոցով կրթության հասանելիության խթանմանը:
«Արդեն չորրորդ տարին է, ինչ մեզ աջակցում է մեր վստահելի գործընկերը՝ Team Telecom Armenia-ն, որը կանգնած է կրթական նորարար նախաձեռնությունների կողքին։ Այս համագործակցությունը վերածվել է իրական կրթական շարժման, որը ոգեշնչում է հազարավոր երեխաների ամբողջ հանրապետությունից։ Շուրջ 60 000 աշակերտ արդեն մասնակցել է Koreez-ի իրականացրած մրցույթներին։ Նրանք ոչ միայն ցուցադրել են իրենց գիտելիքն ու տաղանդը, այլև բացահայտել են սեփական ներուժը՝ հավատալով, որ կարող են հասնել ավելիին։ Շատերի համար այս ծրագիրը դարձել է իրական շրջադարձ՝ բացելով նոր հորիզոններ ու հնարավորություններ և ձևավորելով ինքնավստահության այն զգացումը, որը հիմք է ապագայի հաջողակ, նախաձեռնող և կրթված սերնդի համար»,-ասում է Koreez մրցույթն անցկացնող «Նոր սերնդի դպրոց» հասարակական կազմակերպության նախագահ Սուրեն Ալոյանը:
Koreez-ն ստեղծվել է 2020 թվականին՝ ոլորտում ավելի քան 15 տարվա հաջողված ծրագրեր իրականացնելու փորձ ունեցող Dasaran կրթական ծրագրի թիմի կողմից։ Մրցույթի թեստ-հարցաշարերը հիմնված են դպրոցական ծրագրի վրա։
Team Telecom Armenia-ի մասին
Տելեկոմ Արմենիա ԲԲԸ-ն (ապրանքանիշը՝ Team Telecom Armenia) հայկական ընկերություն է, որը առաջատար դիրք է զբաղեցնում երկրի հեռահաղորդակցության և տեղեկատվական տեխնոլոգիաների ոլորտներում։ Հանդիսանալով Հայաստանում առաջին տելեկոմ ցանցի ժառանգորդը՝ ընկերությունը ունի ոլորտում ծառայությունների մատուցման ավելի քան 100 տարվա պատմություն։
Team-ը տրամադրում է բջջային և ֆիքսված ինտերնետի, թվային հեռուստատեսության, բջջային և ֆիքսված հեռախոսակապի ծառայություններ թե՛ անհատ, թե՛ կորպորատիվ բաժանորդներին։ Հայաստանի բոլոր բնակիչներին բարձրորակ հեռահաղորդակցության ծառայությունների մատուցումը Team Telecom Armenia-ի նպատակն է։ Դրան հասնելու համար ընկերությունն անընդհատ արդիականացնում ու վերազինում է բջջային և ֆիքսված ցանցերը, գործարկում նոր միջազգային կապուղիներ, որոնք նաև բարձրացնում են Հայաստանում ինտերնետի հուսալիության և անվտանգության մակարդակը։