Սևան քաղաքի Շիրազի փողոցի հիմնանորոգման աշխատանքներն ավարտվել են

Գեղարքունիքի մարզի Սևան քաղաքի Շիրազի փողոցում ավարտվել են հիմնանորոգման աշխատանքները, որոնք իրականացվել են ՀՀ կառավարության կողմից 2025 թվականին իրականացվող սուբվենցիոն ծրագրերի շրջանակներում։

Ինչպես «Արմենպրես»-ին տեղեկացրին Սևանի համայնքապետարանի աշխատակազմից, Սևանի Շիրազի փողոցի հիմնանորոգման աշխատանքները մեկնարկել էին 2025 թվականի օգոստոսից։ Մինչև հոկտեմբերի կեսերը իրականացվել են հողային աշխատանքներ, որին հաջորդել են ճանապարհային պատվածքի, ուղիների և մուտքերի, մայթերի կառուցումը, դիտահորերի կափարիչների և եզրաքարերի վերատեղադրումը, տեղային լուծումներով ջրահեռացման համակարգի կառուցումը և այլ շինաշխատանքներ: Շիրազ փողոցի հիմնանորոգումն ընդգրկում է 9995 քմ տարածք: 

Ծրագրի պայմանագրային արժեքը կազմում է 180 միլիոն 193 հազար 680 դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Սևանի համայնքապետարանը։ 

Շինարարական աշխատանքներն իրականացրել է «Ճան-Շին» ՍՊԸ-ն: