1 րոպեի ընթերցում
Հայաստանն այս տարի սկսել է սկրինինգային ընդլայնված ծրագիր, որի շրջանակում պետական պատվերով իրականացվում են մամոգրաֆիկ հետազոտություններ մի շարք սոցիալական խմբերի համար։
«Արմենպրես»-ի հաղորդմամբ՝ Կառավարության հոկտեմբերի 16-ի նիստի ժամանակ այս մասին ասաց առողջապահության նախարար Անահիտ Ավանեսյանը։
«Այս ծրագիրը հնարավորություն է տալիս սոցիալական փաթեթի շահառուներին, հաշմանդամություն ունեցող անձանց, ինչպես նաև տարբեր սոցիալական խմբերի ներկայացուցիչներին անվճար մամոգրաֆիկ հետազոտություն անցնել։ Մասնավորապես, մեր ուսուցիչները, բժիշկները, պետական ծառայողները, զինծառայողների ընտանիքի անդամները կարող են օգտվել այս հնարավորությունից։ Մեր կարգախոսն է՝ «մեկ հետազոտությունը կարող է կյանք փրկել»»,– ընդգծեց նախարարը։
Նրա խոսքով՝ կրծքագեղձի քաղցկեղը Հայաստանում, ինչպես նաև ամբողջ աշխարհում, շարունակում է մնալ մահացության և հիվանդացության հիմնական պատճառներից մեկը։
«Նման կանխարգելիչ արշավների միջոցով մենք կարող ենք ոչ միայն նվազեցնել մահացությունը, այլև ապահովել ավելի բարձր կյանքի որակ։ Շնորհակալ եմ բոլորին, որ Կառավարությունը ևս միացել է այս իրազեկման արշավին»,-նշեց Ավանեսյանը։