2 րոպեի ընթերցում
Պեկինում հայտարարել են ամերիկյան մաքսատուրքերը վճռականորեն չընդունելու մասին և կոչ են արել խնդիրները լուծել երկխոսության միջոցով: «Արմենպրես»-ի փոխանցմամբ՝ այս մասին հաղորդում է Global Times-ը։
«Ես կցանկանայի ուշադրություն հրավիրել այն բանի վրա, որ վերջին ամիսներին ԱՄՆ-ն շարունակել է մի շարք սահմանափակող և պատժիչ միջոցներ կիրառել Չինաստանի դեմ, որոնք լրջորեն խաթարել են չինական շահերը։ Չինաստանը կտրականապես դեմ է հանդես գալիս դրան», - հայտարարել է Չինաստանի ԱԳ նախարարության ներկայացուցիչ Լին Ցզյանը։
Խոսնակը կոչ է արել ԱՄՆ-ին խնդիրները լուծել «երկխոսության միջոցով՝ դրսևորելով փոխադարձ հարգանք», և ապահովել չին-ամերիկյան հարաբերությունների կայուն զարգացումը։
Դրա հետ մեկտեղ Լին Ցզյանը զգուշացրել է, որ եթե ԱՄՆ-ն շարունակի սահմանափակող միջոցներ կիրառել, ապա Չինաստանը «վճռական և անհրաժեշտ պատասխան միջոցներ կձեռնարկի իր օրինական իրավունքներն ու շահերը պաշտպանելու համար»։
Այդպես է նա մեկնաբանել Թրամփի այն խոսքը, որ Միացյալ Նահանգները նոյեմբերի 1-ից 100 տոկոսի չափով մաքսատուրքեր կսահմանի Չինաստանի նկատմամբ։ Թրամփը պարզաբանել է, որ նման որոշումը է կայացրել, քանի որ Չինաստանը «հայտարարել է, թե նոյեմբերի 1-ից արտահանման հսկողության լուրջ միջոցներ կսահմանի ՉԺՀ-ում արտադրվող գրեթե բոլոր ապրանքների նկատմամբ»։
Չինաստանի առևտրի նախարարությունը կոչ է արել Վաշինգտոնին հավատարիմ մնալ ձեռք բերված փոխհամաձայնություններին և սխալ գործողություններ է որակել նոր մաքսատուրքեր սահմանելու սպառնալիքները։